Nuummi Mittarfittaarsuup ammarnerata kingorna angalasut amerliartornerat inuiaqatigiinnut iluanaarutitaqanngilaq, timmisartumik angalanissamut bilitsit akii qaffasippallaarneri peqqutaallutik, Qeqqata Kommuniani borgmesteri, Malik Berthelsen, taamatut isumaqarluni oqaaseqarpoq. Naalakkersuisut Air Greenlandip bilitsinut akigititaannut akulerutissasut kaammattutigaa.
Nunatta avataaniit angallattut 2026-mi ukiup affaata siullermi 5.402-usimapput – 12,3 procentit – ukioq kngullermut sanilliullugu, Naatsorsueqqissaartarfimmiit juulimi kisitsisit takuneqarsinnaallutik. Qaffariaat iluatsittutut nalilerneqarpoq, Qeqqata Kommunianili borgmesteri, Malik Berthelsen malillugu, iluaqutaanani inuiaqatigiit amerlanerussutaannut ajoqutaalersimalluni. Air Greenland-ip aamma nammineq uppernarsarpaa, angalarusussutsip annertusiartornera ilutigalugu bilitsinut akit qaffakkiartortut.
Assersuutigalugu borgmesterimit eqqaaneqarpoq, angallannerup nalaani Sisimiuniit Nuummut utimullu angalaneq 7.000 koruunit tikillugit akeqarsinnaasartoq – minutsit 60-it iluani Sisimiut Nuullu akornanni siumut utimullu timmisartornerinnarnut.
»Inuit ilaquttatik tikeraarusukkaluaraat tusartuarparput, akilli qaffasippallaarneri peqqutaallutik angalanissaraluamut tunniutiinnartarput. Kinami akunnerup ataatsip iluani timmisartornissamut inummut ataatsimut 7.000 koruuninik akilinissaminut akissaqarpa?« taamak aperivoq.
Kalaaliunngitsut angalanerusarput
Naalakkersuisut ersarissarsimavaat, 2024-miit 2025-mut nunanut allanut angallattut 18,2 %-mik qaffariaateqarsimasut, tamanssumalu ersarissarpaa, angalanermut bilitsit akitsoraluartut suli angalarusuttoqartoq. Air Greenlandilli kisitsisaatai malillugit Kalaallit Nunaanni najugallit angallannerat kisimi 2 procentiusimasoq, Danmarkimilu najugallit 25 procentimik qaffariaateqarsimallutik.
»Kalaallit Nunaanni najugallit qaffariaataanngillat. Taakkuami akisaqanngillat,« tamanna borgmesterimit oqaatigineqarpoq.
Berthelsenip innersuussutigaa Air greenlandip akileraarutit orsussarlu akinut qaffaataanerinut nassuiaateqarnera Naalakkersuisunit aamma Greenland Airportsimit isumaqatigineqanngitsoq: Greenland Airports malillugu mittarfimmut akileraarutit 2021-miilli ukiumut kisimi 2 procentimik qaffariaateqarsimapput, orsussamullu akit 2024-miillu liiterimut koruunimik ataatsimik qaffariaateqarsimalluni.
Inuiaqatigiinnit pigineqartoq
Berthelsenip eqqaasitsiissutigaa, Air Greenland inuiaqatigiinnit pigineqartoq, taamaattumillu isumaqarpoq, inuiaqatigiinnut sullissisussatut pilersinneqarsimasoq, inuiaqatigiit angalasinnaanerannut periarfissaqartitsilermat.
»Akit inuiaqatigiinnit qaffasippallaarneri peqqutaalluni akissaqartinneqanngitsut, inuiaqatigiinnut mittatilliinertut isigineqarsinnaavoq, tamannalu akuerineqarsinnaanngilaq,« taamak oqaaseqarluni Naalakkersuisut uparuarpai, namminneq pigisaminnut tunngasunik ersarissumik oqaaseqaratik toqqortuinnartutut pissusilersormata.
»Angalasinnaaneq kiffaanngissusermut attuumassuteqarpoq. Air Greenlandip Kalaallit periarfissamik tuniummanngippatikkit, taavami tamatta angalannginnissatsinnut isumaqatigiiginnarniarta – aamma takornarissat,« taamak oqaaseqarpoq.
