Nikolaj Ludvigsen aamma Anna T. Ludvigsen diamantbrylluppiminnik nalliuttorsiuteqarput. Tassunga atatillugu Kommune Kujalleqimit apersorneqarsimapput.
Ukiorpassuarni politiitut sulisimasoq aamma Nanortallip kommunerisimasaani ukiuni arfineq pingasuni borgmesteriusimasoq, kommunalbestyrelsimilu ilaasortaasimasoq Nikolaj Ludvigsen aamma Anna T. Ludvigsen ukiut 60-it matuma siorna Uummannami katipput.
-Taamanikkut 1966-imi 26-nik ukioqarlunga nuliassara 17-nik ukioqartoq, landshøvdingimit immikkut akuerisaalluta katippugut. Katinnerput asanninnermik aallaaveqarpoq, asannilerlaajullutami aamma nuliara panitsinnik angajullermik naartulerpoq, Nikolaj Ludvigsen kingumut qiviarluni eqqaamasalersaarpoq.
Aappariit katinnermik kingorna Nikolajip politiitut Sisimiunut suliartortariaqarneranik aallaaveqartumik Sisimiunut nuupput, kingornalu Danmarkimut ilinniariartarnerit akornisigut nunatsinni sumiiffinni assigiinngitsuni najugaqartareerlutik 1975-mi Nanortalimmut nuupput, taamanerniillu Nanortalimmiunngorlutik.
-Nuliaralu pingasunik paneqarpugut, nuannaralugu oqartarpunga Kunngi Frederik qulingiluaat kisimi pingasunik paneqassanngimmat pingasunik paneqarluta, Nikolaj Ludvigsen quujasaarluni oqarpoq nangillunilu.
-1975-imi Nanortalimmut nuuppugut, tikiffippullu nuannaringaaratsigut taamanerniit nunasiffigalugu suli najugaqarfigalugu.
Ukiuni 60-ini aappariissagaanni sunaana aappariittut pigisariaqartoq?
–Asanninneq pingaarnerpaavoq, aammali aappariittut ulluni oqimaatsuni oqinnerusunilu tapersersoqatigiissinnaaneq. Taakku pigigatsigit ukiorpassuarni aappariilluta ukiut 60-it anguagut, Nikolaj Ludvigsen oqarpoq.
Nikolaj Ludvigsenip nuliatalu Anna T. Ludvigsenip ukiunik 60-ini katiffissiorneranni Kommune Kujallermiit pilluaqqungaarpagut.
