Ukiup atuarfiusup 2026/2027-p aallartinnerani Narsap Atuarfiani atuarneq aallartippoq atuarfik ilinniartitsisunik ilinniarsimasuinnarnarnik sulisoqarluni.
Ataasinngornermi aggustip qulingani Narsap Atuarfiani atuartut atualerlaallu ukiup atuarfiusoq nutaaq aallartillugu atualerput.
-Tulluusimaarnaqaaq Narsap Atuarfiani ilinniartitsisoqarnitsinni ilinniarsimasuinnarnik sulisoqarnerput. Qujamasuttorujussuuvunga ilinniartitsisut pimoorussisut ilinniarsimasullu suleqatigalugit ukioq atuarfiusoq nutaaq aallarteqqikkatsigut, Narsap Atuarfiani pisortaq, Kattie Egede Motzfeldt oqarpoq.
Ukiuni kingullerni qulini Narsami ilinniartitsisoqarniarneq eqqarsaatigalugu assiliaq ullumikkumiit allaanerujussuuvoq. Ullumikkut ilinniartitsisut ataqatigiilluarlutik suleqatigiilluarlutillu atuarfik nukittuumik inissisimalersippaat.
-Ilinniartitsisut suleqatigiilluarnerat ersarippoq, atuartitsinerlu pillugu ataatsimoorluta oqallissinnaanerput aamma nukittoriartuinnarpoq. Tullinnguullugu atuakkersortitsinermik paasinninneq (qallunaatut pædagogisk indblikimik taasagaat) atuarfitsinni nukittorsarusullugu suliniuteqarpunga, Kattie Egede Motzfeldt oqarpoq.
Narsap Atuarfiani ilinniartitsisut 28-usut 1. Klassiniit 10. klassit ilanngullugit atuartunut 166-nut ilinniartitsisuupput.
