Nanortalik aamma Nanortallip eqqaani nunaqarfiit Narsamijit, Aappilattoq, Tasiusaq, Ammassivik kiisalu Alluitsup Paa, Kommune Kujallermit anillutik nammineq kommuninngorusunnersut taasititsissutigineqassaaq.
Taasititsinerup inerneri Inatsisartut suleriaqqinnissaanni paasissutissatut atorneqassapput, Inatsisartummi taakkuupput Nanortaliup nunaqarfiisalu nammineq kommuninngusannginnerannut kommuninngorsinnaanerannulluunniit aaliangiisussat.
Taasititsinissarli pitinnagu kommunalbestyrelsimi ataatsimiititaliat siulittaasui aamma Aningaasaqarnermut Inuussutissarsiornermullu Ataatsimiititaliami ilaasortat pisinnaasut Nanortalimmi nunaqarfittaanilu innuttaasunik ataatsimiititsissapput.
– Septembarip aqqarnanni taasititsinerup inernera Naalakkersuinikkut suliaqartunut ingerlateqqinneqassaaq, inerneriumaagaa pillugu suleriaqqinnissamut kommunimiit aalingiisinnaanavianngilagut, suliassarmi Inatsisartuni aaliangiiffigineqarluni suliarineqarumaarpoq. Taamaattumik isumasiuititsillluni taasititsinissaq sioqqullugu innuttaasunut ataasimiititsinissatsinnut innuttaasut peqataalluarumaarnerat neriuutigaara, ilisimasassanimmi immersorneqarfiussaaq, apeqquteqartoqarsinnaassallunilu, borgmesteri Malene Vahl Rasmussen oqarpoq.
Aggustip aqqarnani Narsamijini aamma Aapilattumi, aqqaneq aappaanni Nanortalimmi Tasiusamilu kiisalu 13-ianni Ammassivimmi Alluitsup Paanilu innuttaasunik ataatsimiisitsisoqassaaq, sumiiffissai nalunaaqutaalu kingusinnerusukkut nalunaarutigineqarumaarput.
