Kommune Kujalliup aamma Timersoqatigiit Katuffiata suleqatigiissutigisaannik atuarfinni timimik aalatitsinerunissamut siunertaqarluni pinnguaatinik pajuttuineq ingerlanneqaleruttorpoq.
Pinnguaatit Kommune Kujallermi atuarfinni timimik aalatitsinermut atorneqartussat Qaqortumi, Narsami aamma Nanortalimmi tiguneqarsimalereerput, maannalu nunaqarfinnut apuussuinerit ingerlanneqaleruttorput.
– Sapaatip akunnera una nunaqarfinnut angalaneq iluatsillugu Aappilattoq, Narsarmijit, Ammassivik aammalu Alluitsup Paa pajunneqarput. Pinnguaatit timimik aalatitsinerunissamut atorneqartussat sumiiffinnut apuussorneqartut atorluarneqarumaarnerat neriuutigaara, atuarfimmimi timimik aalatitsinerunissaq kommunitsinni anguniagaraarput, Kommune Kujallermi Timersornermi peqatigiiffilerinermilu siunnersorti, Bolethe Stenskov oqarpoq.
Qaqortup nunaqarfiinni atuarfeqarfik Eqalugaarsuit aamma Narsap nunaqarfiini atuarfiit aggustip qaammataani pajunneqarnissaat pilersarutaavoq.
Paasissutissaq:
Kommune Kujalleq aammalu Kalaallit Nunaanni Timersoqatigiit Kattuffiat ukiuni pingasuni suleqatigiinissaminnut atsioqatigiinnikuupput 2025 – 2027.
Atsioqatigiinnermi qulequttat pingasut suliutigineqartussaapput tassaallutillu:
v Atuarfimmi aalaneq
v Game Greenland
v Nammineq Kajumissutimik sulineq
