Piffissami kingullermi Narsami eqqavissuaq eqqakkanik ulikkaariartuinnalersoq iliuuseqarfiginiarlugu torersaasoqaleruttorpoq.
Eqqaavissuarmi eqqakkat amerlatsilluinnarsimasut iliuuseqarfiginiarlugit Qaqortumiit Narsamut suliartortitsisoqarpoq.
-Eqqaavissuarmi poortuisut ikiortariaqarmata Qaqortumiit eqqakkanik poorsuarnut poortuisussamik Narsamut suliartortitsivugut, taanna sapaatip akunnerini marlunni eqqakkanik poortuinermik suliaqassaaq, eqqakkammi 3000 kubikmeteriusut poortorneqartussaapput. Poortuereernerup kingorna eqqakkani allani ikuallassinnaasut ikuallassinnaanngitsullu immikkoortiterneqarnissaat suliassatut tullinnguutissavarput, Kommune Kujallermi Avatangiisinut ingeniøri, Jakob Petrussen nassuiaavoq.
Eqqakkanik immikkoortiterinissamut atatillugu entreprenørinik suleqatissarsiorneq ingerlanneqassaaq.
-Eqqakkat ikuallajasut ikuallassinnaanngitsullu immikkoortiternissaanut entreprenørinik suleqatissarsiussaagut, suliariumannittussarsiuussinerlu entreprenørinut neqeroorumasunut nassiussisoqareerpoq, neqeroorullu kommuunimit akuerineqarpat immikkoortiterineq aallartinneqarumaarpoq, Jakob Petrussen oqarpoq.
Naatsorsuutigineqarpoq ukiup naannginnerani immikkoortitserinerup aallartikumaarnera.
