Sapaatip akunnerata naanerani Kalaallit Nunaata sineriaaneersut Narsap Iluani aasaanerani tammaarsimaarfigalugu Aasiviup ukiut 50-inngortorsiornera malunnartinneqarpoq – sumiiffik, Aasiviup siullermeerluni 1976-imi ingerlanneqarfiani. Ullorsiorneq ataatsimoortumik oqariartuuteqarluni naggaserneqarpoq, tassani peqataasut Inatsisartunut aamma Naalakkersuisunut innuttaasut atugarissaarnerat siulliullugu aallutissagaat kajumissaatigineqarluni – aammalu USA-p præsidentianut Donald Trumpimut ersarissumik oqariartuuteqarpoq, Kalaallit Nunaat tuniniagaanngilaq. Oqariartuut ulloq 12. Juuli akuerineqarsimasoq tamaat uani atuarneqarsinnaavoq:
Aasivik 2026 – Narsap Ilua
Ataatsimoorluta nukittuvugut
Inuit siulersuatta nunaanni Narsap Iluani ukiut 50-it nalliuttorsiutigalugit sineriassuatsinnit sumi tamanit katerittugut nunarsuarmioqatitsinnut makku eqqaamajuaqqullugit avammut suaarutiginiarpavut:
- Inuiaat kalaallit qangaaniilli nunartik sutigut tamatigut pissaqarfigalugu nunagiuarsimavaat, inuiannut allanertanut inussiarnersuullutik tikilluaqqusisuullutillu. Inuiaat kalaallit pinngortitarsuarmi issittormiuusut inuiannut allamiunut ukiut untritillit akeqqersimaarnatik inuuffigineqarsinnaasup killerpiaani eqqissinermik akaareqatigiinnermillu pingaartitsillutik inuusinnaajuarsimapput.
- Inuiaat kalaallit utoqqartaminnut siulersuaminnullu ataqqinnittuupput asannittuunutillu. Kingulissaminnut sernissuillutik siunnersuisuulluti!lu perorsarsimammatigut qujassutissaqarfigeqaagut, tamannalu pillugu ataqqinartumik qimagunnissatta tungaanut isumassortuarlugit paariuassallugillu inuiaqatigiit kalaaliusugut mikinngitsumik pisussaaffeqarpugut.
- Utoqqartavut amerliartorput, inuiaqatigiillua ingerlateqqinnissaannut pilersuisussavut ikiliartorput, angerlarsimaffeeruttullu amerligaluttuinnarlutik. Qaavatigullu peqqinnissaqarfimmi katsorsartittussat ikiugassallu, iluamillu pineqarnissamik noqqaasut, amerliartorlutik. Taarnaattumik tupinnanngitsumik inoqativut aamma amerlianortut nuna asasartik ilineqarfissartillu qimallugu Danmarkimut nussorput. Taamaammat – asasavut nunatsinni Inatsisartuvut Naalakkersuisuvullu: Iliuuseqaritsi, kingusinaartigasi! Innuttasi salliutittuarisigit.
- Ataatsimuuleraangatta inuiaat kalaallit nukissuarmik angingaartumik pilersitsiuartarpugut, nukillu tamanna erligalugu paarisassaraarput.
- Taamaammat nunatsinnut inuinullu innimiillioqaluni nunatsinnik Kalaallit Nunaanniittunik aqutsiniarluni tiguaaniarlunilu sioorasaariuartumut, USAp presidentianut Donald Trumpimut oqaasissarput mannaavoq: Narsami uranimik piiaaniarsarinersi qalluiniarnersilu naaggaarluinnarparput! Aamma nunatsinni tiguaaniarnerit arsaarinninniarnerillu akiortuassavavut toqussarput tikillugu Nunarput naassaanngitsumik nunagigatsigu illersortuarumallugulu.
Aasivik 2026-mi Narsap Iluani aaseqataasut
12. juli 2026
