Qaqortumi ikuallaavik atorunnaarmalli eqqakkat 6000 tonsit missaanik oqimaassuseqartut maannamut poortorneqarsimalerput, taakkunanili ikuallajasuunngitsunik naammattuuisoqartarmat immikkoortitserisarnissaq kaammattuutaavoq.
Ukiut sisamat matuma siorna Qaqortumi ikuaallaavik atorunnaarmat eqqakkat ikuallajasut poorsuarnut poortorneqartalerput, maannalu 10.000-issat poorneqarsimalerpoq.
-Poorsuaq ataaseq 600 kg missaani oqimaassuseqartarpoq, poortuissutittalu atorneqalerneraniit poorsuit 10.000-issaat maanna poortorsimalerparput. Poorsuit poortorneqartut Esani-p umiarsuaanik aaneqartarput Sisimiunullu assartorneqartarlutik, Frederik Karlsen, Qaqortumi eqqakkanik tigooraavimmi aqutsisuusoq oqaluttuarpoq.
Eqqakkat poortorneqarneranni eqqakkat ikuallajasuunngitsut naammattoorneqartarput, taakku immikkut iginneqartarnissaat kaammattuutaavoq.
-Eqqakkat poortorneqarneranni batterikut, elektronikkit, eqqiaanermut atortut sakkortuut puukui, qalipaatit, akoorutissallu ulorianassutsimik ilisarnaatillit naammattoorneqarsinnaasarput. Taakku pinngortitamut mingutitsinnginnissaq eqqarsaatigaluu eqqakkanut navianartunut karsinut aappaluttunut iginneqartarnissaat kaammattuutigissavarput, taakkumi sianerluni saaffiginninnikkut kommunimiit aaneqariaannaapput, Frederik Karlsen oqarpoq.
