Nunatsinni meeqqat, inuusuttut inersimasullu amerlavallaat naqinnernik ilisarsisinnaannginnerminnik allatigullu atuarniarnerminnik allanniarnerminnillu ajornartorsiuteqarnerminnik ikiorserneqarnissaminnut pisariaqaraluartumut ullutsinni periarfissaqanngillat.Tamanna ajornatorsiut inuit ataasiakkaat periarfissaannik killiliiginnanngilaq, aammali inuiaqatigiit ataqatigiinnerat ineriartornerallu ulorianartorsiortippaat. Naalakkersuisut pissutsit taama ittut maannakkut pingaaruteqartumik suliniuteqarfigilerpaat.
”Meeqqat, inuusuttut inersimasullu akornanni naqinnernik ilisarsisinnaannginnerup allatigullu atuarnermik allannermillu ajornartorsiuteqarnerup pitsaaliornissaannut nuna tamakkerlugu iliuusissatut pilersaarummi 2025–2029”-mi suliniutit ataatsimoortut, anguniagaqarfiusut tamakkiisumillu isiginniffiusut saqqummiunneqarput, pitsannguinernik piviusunik qulakkeerinnittussat – ukiut, ilinniakkat qaffasissusii suliniuteqarfiusullu akimorlugit ingerlanneqartussat. Iliuusissatut pilersaarut nutaaq Ilinniartitaanermut Aqutsisoqarfiup isumagisaanik suliarineqarpoq, siunissamilu suliniutit aqutsisoqarfimmit tassannga aallaaveqassapput.
Iliuusissatut pilersaarut 2021-ip ukiaani Inatsisartut aalajagingaannik tunngaveqarpoq, taamanikkut inatsisartut tamarmiullutik nuna tamakkerlugu iliuusissatut pilersaarutissap suliarineqarnissaa isumaqatigiissutigivaat (UKA 2021/29, UKA 2021/47 aamma UKA 21/73).
“Naqinnernik ilisarsisinnaannginneq uaniititsuartarpa, taamaattumillu nuannaarutigaara maannakkut anguniagaqarfiusumik iliuusissatut pilersaaruteqaleratta, atuarniarnikkut ajornartorsiutinik pitsaaliortitsisussamik. Siusinaartumik suliniuteqartarnitsigut, eqqortunik ikiuutinik atuinitsigut ilinniarluarsimasunillu sulisoqarnitsigut annertuutigut pitsanngortitsisinnaavugut – atuarfimmiinnaanngitsoq, inuunermulli tamarmut. Kikkulluunniit arajutsineqassanngimmata pilersaarutip inuiaqatigiinni suliniuteqarfiit tamaasa akimorlugit suliniutinik nukittorsaanissatsinnut pisussaaffilerpaatigut. Inuiaqatigiinnut naligiissitsinerusunut peqataatitsinerusunullu alloriarneruvoq pingaaruteqartoq, kikkulluunniit tamarmik takorluukkaminnik inuiaqatigiinni piviusunngortitsinissaminnut periarfissinneqartussaammata, ilinniagaqarnissaq kisiat eqqarsaatiginagu, inuunerli tamaat eqqarsaatigalugu”, Nivi Olsen, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq oqarpoq.
Iliuusissatut pilersaarummi suliniuteqarfiit pingaaruteqartut sisamat suliniuteqarfiusussaapput:
1. Misiligutit qulaajaassutillu kalaallisut oqaasertallit ineriartortinneqarnerat
2. Atuarnermut allannermullu sakkut digitaaliusut kalaallisut oqaasertallit atuutsilersinneqarnissaat
3. Inatsisit piareersaaffigalugit suliniutit
4. Atuartitsisut siunnersuillu ilinniagaasigut qaffassarneqarnissaat.
Suliniutit taakkua suliassanut ataasiakkaanut piviusunngortinneqarsinnaasunullu tutsinneqassapput, inunnut ataasiakkaanut ilinniartitaanermullu tamarmiusumut nukittorsaataatilerlugit.
Pilersaarummi matumani siunissaq naapertuilluarneruffiusoq peqataatitsiffiunerusorlu tunngavilerneqarpoq, kikkut tamarmik – qanoq atuarsinnaatiginertik apeqqutaatinnagu – ilikkagaqarnissaminnut peqataanissaminnullu inuiaqatigiinnilu kalaallini atugarissaarnermut sunniuteqarluartumut ilassuteqarnissaminnut periarfissaqarfigisassaat.
Iliuusissiami suliniuteqarfissat tigussaasut pillugit annertunerusumik paasissutissiisoqarnissaa ingerlanneqarpoq.
