Naalakkersuisut 25. juni 2026 aalajangerpaat, Qaanaami aalisarnermik ineriartortitsinissamut pilersaarusiortoqassasoq. Tassunga atatillugu ingerlataqartut attuumassuteqartut ilaasortaralugit suleqatigiissitamik pilersitsisoqassasoq aalajangerneqarpoq. Tunumi ineriartortitsinissamut pilersaarut assigalugu suleqatigiissitaq Qaanaami eqqaanilu inoqarfinnut piffissamut ungasinnerusumut aalisarnermik ineriartortitsisussamik pilersaarusiussaaq.
Aalisarnermut, Piniarnermut, Nunalerinermut Imminullu Pilersornermut Naalakkersuisoq maajip 16-ianit 19-ianut innuttaasut oqaloqatigilluarlugit Qaanaamiippoq. Oqaloqatigiinnerni sumiiffimmi piffissamut ungasinnerusumut aalisarnermik ineriartortitsinissamut pilersaarut kissaatigineqarpoq. Tamannalu tunngavigalugu Naalakkersuisut suliassaq aallartisarpaat.
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup suliaq maanna aallartissavaa, aasaaneranilu sulinngiffiup kingorna suleqatigiissitap ilaasortassaanik qaaqqusissalluni.
