Ukiup atuarfiusup naammassinerani Tasersuup Atuarfiani ilinniartitsisut Marie Sara Larsen aamma Maannguaq P. Hegelund ilinniatitsisutsialattut akissarsitinneqarput.
Ileqquulersimasutut Tasersuup Atuarfiani ukioq atuarfiusoq naammassigaangat ilinniartitsisutsialannik toqqaasoqartarpoq, ukioq mannalu ilinniartitsisutsialanngortut Great Greenlandimiit, 60° Nord-imiit Kommunimiillu akissarsitsinneqarput.
– Marie Sara Larsen aamma Maannguaq P. Hegelund ukiup atuarfiusup ingerlanerani tunniusimallutik sulisimanerannut, suleqatiminnullu sullissilluarlutik siunnersuisarnermikkut sulilluarsimanerat pillugu nersorniarneqarput. Nersorniarneqarneranni Great Greelandip aamma 60° Nord-ip kommunillu tunissuteqarnerannut manna iluatsillugu qujarusuppunga, Simon Simonsen, Tasersuup Atuarfiani ilinniartitsisoqatigiit sinnerlugit taama oqaaseqarpoq.
Tallimanngornermi juunip 19-ianni ilinniartitsisutsialannik akissarsititsisoqarnerani februaarip aallaqqaataaniit atuarfimmi pisortaagallartutut sulisimasoq Hans Peter Broberg, aallartussanngortoq, atuarfiup toqqissisimanarnerusumik suliffiusinnaaneranut sulilluarsimaneranut aamma qujaffigineqarpoq.
