Campus Kujallermi ilinniarnertuunngortut allagartartaarneranni borgmesteri sinnerlugu kommunalbestyrelsimi ilaasortaq Maaliaaraq Nielsen pilluaqusilluni oqalugiarpoq, legatimillu tunissuteqarluni.
Ilinniarnertuunngortut ukiuni pingasuni ilinniareerlutik ataasinngornermi juunip 22-anni allagartartaartut pilluaqquneqarlutik oqalugiarfigineqarput.
-Inuiaqatigiinni sullissinermi nunaqqatigut ilinniarluarsimasut atorfissaqarteqigatsigit siunissamut isumalluarfigaassi, killiffissinnilu maligassiuilliarnissinnut qujamasullunga. Allagartarmi pigiligarsi pappiaraannaanngilaq, ilinniaqqiffissarpassuarnummi matuersaataavoq. Alloriaqqittussangornissinni nunatta siunissaanut ilusilersueqataalluarisi, pilluaqqigitsi ullorsiorluarisilu, Maaliaaraq Nielsen borgmesteri sinnerlugu oqaaseqarluni pilluaqqusinermini ilaatigut taama oqarpoq.
Kommune Kujallermiit nersornaat legati 3000 kroninik aningaasartalik ilinniarnertuunngortut akornanni ilinniartitsisunit maluginiarneqarluarsimasumut aamma tunniunneqarpoq.
Nersornaammik pissarsisoq ilinniakkat tungaasigut nukittuujuvoq aammalu ilinniartitaanermi isummersorsinnaalluartuulluni. Ilinniakkatigut sullerinnermi sanitigut ilinniarnertuunngorniarfimmi nammineq kajumissutiminik timersornikkut aamma unnussiuaartitsinissanut suleqataasarpoq, ilinniartoqatiminullu annertuumik ikiuuttarnermigut kajumissuseqalersitsisarluni, tassaavorlu Klara Matilde Kristoffersen.
