Visit Greenlandip siulersuisuisa Linda Kleist pisortassatut atorfinitsippaat. Taamaalilluni Anne Nivíka
Grødemip tunuarniuteqarnerata kingorna pisortaagallarsimasoq Linda Kleist ingerlatseqatigiiffimmi
siuttuuffiginnartussanngorpoq.
Atorfinitsitsineq pivoq atorfinitsitsinermi ingerlariuseq malillugu, tassanilu Visit Greenlandip siumut
isigisumik aqutsisoqarnissaanik pisariaqartitsinerata ataavartumik, patajaatsumik ersarissumillu
siunnerfeqartumik qulakkeernissaa ingerlatseqatigiiffiup nuna tamakkerlugu takornariaqarnermik
suleqqinnissaanut siulersuisut pingaartissimavaat.
“Visit Greenland pingaarutilimmik suliassaqarpoq. 2035-ip tungaanut periusissiatta ersarissumik
tunaartalersimavaa ingerlatseqatigiiffiup qanoq Kalaallit Nunaata ornitassatut inissisimaneranik
nukittorsaanissaq, aammalu nunaqavissunut naleqalersitsiviusumik Kalaallit Nunaatalu
nammineerluni atugassarititaanut aallaaveqarluni takornariaqarnikkut akisussaassuseqartumik
ikorfartuinissaq. Tamatumani periusissiamik suleriusinngortitsisinnaasumik, ingerlatseqatigiiffimmik
ataatsimoortitsisinnaasumik ornigassani, suliffeqarfinnik, oqartussaasunik nunallu tamalaat
akornanni suleqatinik nukittorsaasinnaasumik tamatumani pisortaqartariaqarpoq. Lindalu
suliassamut tassunga ingerlatsisinnaalluarpoq,” Visit Greenlandimi siulersuisuni siulittaasoq Anette G.
Lings taama oqarpoq.
Linda Kleist Head of Destination Development & Cruise i Visit Greenlandimi atorfeqarsimavoq, 2023-
imiillu nuna tamakkerlugu sumiiffiit takornariarfiusuni ineriartortitsinermik, nunap immikkoortuini
takornariaqarnermut siunnersuisunik suleqateqarnermik, takornarialerisunik oqaloqateqarnermik
aammalu periusissianik tunngaveqarluni nuna tamakkerlugu suliniuteqarnermik suliaqarsimalluni.
Visit Greenlandip aqutsisoqatigiivini ilaanikuuvoq aammalu sumiiffinni takornariarfiusuni,
suliffeqarfinni suleqatinillu qanimut suleqateqarluni periusissiamik suleriusinngortitsinermut
sulialittut aqutsisuniittutullu akisussaaffeqartarsimavoq.
Visit Greenlandimi sulilernissani sioqqullugu Linda Kleist Destination Diskobayimi Destination
Manageriusimavoq, ilaatigut nunap immikkoortuani ornitassanut nittarsaassinermik,
takornarialerisunik suleqateqarnermik, wayfindingimik, ersarissaanermik najukkamilu
takornariaqarnermik ineriartortitsinermik suliaqarsimalluni.
“Ingerlatseqatigiiffiup nuna tamakkerlugu atuuffiani siuttuusinnaasumik ilutigitillugulu Kalaallit
Nunaata nunat tamalaat akornanni inissisimaneranik nukittorsaasinnaasumik Visit Greenlandip
pisortaqarnissaa pisariaqartippaa. Periusissiornikkut ataatsimut isiginnissinnaaneq, niuernikkut
ingerlatsinermik paasisimasaqarneq aammalu sumiiffiit takornariarfiusuni, suliffeqarfiit nunallu
tamalaat akimorlugit sanngisuumik suleqatigiissinnaanermik piginnaasaqarneq tamatumani
pisariaqarpoq. Lindallu tamakku pisinnaasaqarfigai. Ingerlatseqatigiiffik ilisimaarilluarpaa, najukkami
nunalu tamakkerlugu takornariaqarnikkut ineriartortitsinermik patajaatsunik misilittagaqarpoq,
periusissiallu suleriusinngortissinnaaneri ingerlariutsinilu pisariusuni siuariartortitsisinnaassutsi
takutissimallugu” Anette G. Lings oqarpoq.
Siulersuisut ersarissaatigaat Linda Kleist Visit Greenlandip kivitassaanut suliassamut ataatsimut
paasisimannilluartuusoq – nunat tamalaat akornanni inissisimaffimmiit aammalu najukkami
naammassineqarsinnaasunut, najukkamilu naammassineqarsinnaasut nittarsaanneranniit
takornariaqarnermut inuussutissarsiutinut naleqalersitsinermi.
Linda Kleist Kalaallit Nunaanni inunngorpoq peroriartorlunilu aammalu peroriartornermini
sulisartuunerminilu nunarput tamaat angalaffigisimallugu. International Hospitality Managementimi
professional Bacheloriuvoq markedsføringsøkonomitullu tunuliaqutaqarluni.
Kalaallit Nunaata takornariarfissatut nunat tamalaat akornanni inissisimaffianik nukittorsarnissaa
aammalu nunamut tamarmut pissarsiffiusumik naleqalersitsivigineqarnissaa nangillugu Visit
Greenlandimi suliarineqarnissaanut Linda Kleist siuttuussaaq.
“Siulersuisut tatiginninnerat qujamasuutigisorujussuuara, suliassamullu maniguullunga. Kalaallit
Nunaat angerlarsimaffigaara, nukigalugu ilinniarsimasutullu tunngavigalugu. Nangillugu
suleqataaffigerusuppara Visit Greenlandip nunat tamalaat akornanni inissisimanerata
nukittorsarnissaa aammalu nunatsinnik alapernaallutik ataqqinnillutillu takornariarusuttunut
pilerinarsaanissaq – takornariaqarnerullu suli annertunerusumik najugaqartunut peqataasunut
naleqalersinneqarnissaa suleqataaffigerusullugu. Uannut akisussaassuseqartumik
takornariaqarnikkut ineriartortitsineq aamma tassaavoq takornariaqarnikkut
inuussutissarsiuteqarnermik pilerinartunngorsaaneq aammalu Kalaallit Nunaata najugarinissaata
takornariarnissaatalu pitsaasuunissaanik ineriartortitsineq,” Linda Kleist oqarpoq.
Visit Greenlandip suliarileruttugaata ataavartumik ingerlanneqarnissaa ingerlatseqatigiiffiullu
periusissiaanik tigussaasumik inerneqalersinnissaa siulersuisut atorfinitsitsinermikkut
qulakkeerneqassasoq kissaatigaat. Kalaallit Nunaannut soqutiginninneq piffissami matumani nunat
tamalaat akornanni annertusiartuleruttorpoq, takornariaqarnerullu ineriartornerani ersarissumik
pingaarnersiuisoqarnissaa, nukittuumik suleqatigiittoqarnissaa aammalu najugaqavissut
takornarialerisut, ornitassat, suliffeqarfiit, oqartussaasut aammalu nunat tamalaat akornanni suleqatit
qanimut suleqatiginissaat pisariaqartinneqarpoq.
