Peqataasut 16-it Qaanaameersut, Upernavimmeersut, Uummannameersut Ilulissaneersullu Ilulissani 12-pax angallatinut pikkorissarneq maanna angusillutik naammassivaat. Pikkorissarneq maajip 8-anniit 29-annut Majoriaq aamma Avannaata Kommunia suleqatigiillutik ingerlappaat, ilinniartitsinerlu Imarsiornermik Ilinniarfiup isumagaa.
Pikkorissarnerup ingerlanerani peqataasut ilaatigut motorilerineq, usit ulorianartut, sumiissusersiorneq aamma imaani angallannermi maleruagassat pillugit ilinniartinneqarsimapput. Pikkorissarneq AMA-pikkorissarnertut ingerlanneqarpoq, peqatigisaanillu Avannaata Kommuniata tapersersugaanik misiliutitut suliniutaalluni.
Borgmester Lars Erik Gabrielsenip pikkorissarnerup ingerlanerani peqataasut piumassuseqarlutik peqataasimanerat sulilluarnerallu pillugu qutsavigai, erseqqissarlugulu suliniut tamanna aatsaat aallartisarnertut isigisariaqartoq.
”Avannaata Kommuniani innuttaasut ilinniarnissamut pikkorissarnissamullu suli amerlanerusunik periarfissaqarnissaat kissaatigaarput. Tamanna 12 PAX angallatinut ingerlatsisinnaanermut uppernarsaat kisiat pinnagu, aamma suliassaqarfiit allat, piginnaasanik sulisussanillu pisariaqartitsiffiusut, eqqarsaatigalugit atuuppoq. Anguniagaraarput suliffeqarneq nukittorsassallugu, innuttaasunut periarfissanik nutaanik pilersitsissalluta aamma kommunimi tamarmi pitsaasumik ineriartorneq tapersersussallugu,” Avannaata Kommuniani borgmesteri Lars Erik Gabrielsen (S) oqarpoq.
Pikkorissarnerup siunertaraa takornarianik imaatigut angallassisarnermi piginnaasat nukittorsarnissaat, aamma Kalaallit Nunaata Avannaani innuttaasunut periarfissanik amerlanerusunik pilersitsinissaq.
Pikkorissarnerminnik naammassinneqqammersut maanna aasaanerani ulapiffiusumi sulinermut peqataasinnaanerulernissamut piareersimanerupput, piffissami tassani takornariaqarnermi imaatigullu angallassinermi sulisussanik piginnaasalinnik pisariaqartitsineq annerpaajusarmat.
