Allattarl! suliniutaavoq, rap aamma taalliorneq aqqutigalugit inuusuttunut oqariartuuteqartitsisoq.. Danmarkimit Det Starter Med Musikken (DSMM) aamma Nunani Avannarlerni Piorsarsimassutsikkut Attaveqaat (NAPA) akornanni qanimut suleqatigiinnikkut Nuummi, Paamiuni aamma Nanortalimmi rap-campinik pilersitsisoqassaaq.
ALLATTARL! tunuliaquttat akimorlugit ilinniarnermik pilersitsiffiusumik aamma peqataatitsisumik inuusuttunik katersuutsitsiniarpoq. Suliniut inuusuttuni nipilersorneq aamma ataatsimoorneq aqqutigalugit atugarissaarnermik, imminut naleqartinnermik aamma iliuuseqarsinnaanermik pitsanngorsaanissamik siunertaqarpoq. ALLATTARL! piffissami 25. maj – 15. juni 2026 ingerlanneqassaaq
Suliniut atassuteqarnermik tunngavilimmik periuseqarpoq, nipilersorneq tatiginninnermik, ataatsimoornermik aamma inuttut ineriartornermik pilersitsinermut atorneqarluni.
”Ininik ammasunik, nutaaliorfiusunik aamma atassuteqarfiusunik pilersitserusuppugut, inuusuttut naligiimmik naapillutik aamma naapinneqarlutik, eqqumiitsuliornikkut inuttullu ineriartorlutik, nipilersorneq aamma oqaluttuarneq ataatsimut oqaaserineqarlutik. Allattarl! suleqatigiinnernik nukittuunik aamma sammisaqarluni ilisimasanik avitseqatigiinnermik aallutaqarpoq.”, Manuela Reith Rasmussen, suliniummik aqutsisoq, Det Starter med Musikkenimeersoq oqarpoq.
Marlunngorneq ulloq 26. maj 2026 Nuummi NUIF-imi ammatitsisoqassaaq, nal. 15.30-20.00, Det Starter Med Musikken Nunani Avannarlerni Piorsarsimassutsikkut Attaveqaat suleqatigalugu Allattarl! ilisaritinneqassaaq. Marlunngornerni marlunni tulliuttuni Paamiuni aamma Nanortalimmi assinganik aamma assinganik anguniagaqarfiusumik illumik ammatitsisoqassaaq.
Illumik ammatitsinerni kikkut tamarmik soqutiginnittut rap campinut nuannerluinnartunut Nuummi, Paamiuni aamma Nanortalimmi oqaloqatigiinnissamut aggernissaannut qaaqquagut, ilinniartitsisut pikkorissut aamma isumassarsiorfissat peqatigalugit. Sumiiffinni taakkunani Allattarl! ulluni tallimani rappernermik, taalliornermik, nutaaliornermik aamma nipilersornermik nuannisarfiusunik neqerooruteqarpoq, taakkulu tamarmik inaarutaasumik tusarnaartitsinermik aamma nalliuttorsiornermik naammassineqassapput.
NAPA-p allannermik unammisitsinera ALLATTA! Maanna ukiuni arlalinni ingerlasimalerpoq, inuusuttunillu pingaartumik angutinik/nukappissanik ornigutsitsiniartarneq ajornakusoorsinnaasartoq misigisarparput. Kisianni amerlasuut allatut allaaserinnittarput, assersuutigalugu nipilersukkanut allattarlutik. Taamaattumik maanna inuusuttunut allamik neqerooruteqarpugut, inuusuttut eqqumiitsuliornikkut oqariartuuteqarfigisinnaasaannik, NAPA-mi pisortaq Susanne Andreasen oqarpoq.
Ilinniartitsisut Kalaallit Nunaannit aamma Danmarkimit
Ilinniartitsisut avatangiisinik nuannersunik aamma iliuuseqartitsisumik pilersitsinissaminnut qilanaarput, nipilersorneq aamma misigisamik qamuuna aalatitsisumik. Manuela Reith Rasmussen (suliniummik aqutsisoq) & Bigg Kaka (nipilersornermik aqutsisoq) rap campini siuttuussapput.
Peqatigiillutik aqqit ilisimaneqartut soorlu $MALIKK, Andachan, Parnaq aamma Angukasik, FiNNi aamma Minik Hansen peqatigalugit isumassarsiortitsinissamut aamma inuusuttunik sullissinissamut piareersimapput.
Danmarkimit aamma Iris Poparic rappernermut sungiusaasoq ukiorpassuarni taalliornermik, qitinnermik aamma takutitsinermik misilittagaqartoq peqataassaaq. Nuummi inuusuttut aamma tusarnaariartut Det Starter Med Musikkenimi Danmarkimi campinik aamma ilinniartitsinernik ingerlatsisimasoq Lucas naapissinnaavaat.
Rappernermik campertitsinerit Nuummi, Paamiuni aamma Nanortalimmik najukkani suliaqartut qanimut suleqatigalugit ingerlanneqassapput, inuusuttunut klubbit, nipilersornermik ilinniarfiit aamma kulturikkut suliaqarfiit ilanngullugit.
Atuakkamik suliniut aamma ilisimasanik ingerlatitsineq
Rap campertitsinerit ingerlanneqarnerisa kingorna peqataasunit tamanit allakkat ataatsimut atuakkamik suliniummut katersorneqassapput.
Saqqummersitaq kalaallisut, qallunaatut aamma tuluttut saqqummersinneqassaaq, eqqumiitsuliatut katersukkatut ingerlatsinerit takussutissaattut ataavartussatut inississalluni.
Saqqummersitap inuusuttut nipaat oqaatsit, illoqarfiit aamma tunuliaquttat akimorlugit katersussavai, aammalu AlLATTARL! aqqutigalugu pilersinneqartumut oqariartuutitut pissaaq.