Nunatsinni Peqqinnissaqarfiup Danmarkimilu nunap qitiusumik immikkoortuisa akornanni suleqatigiinneq nukittorsarneqarlunilu annertusarneqassaaq. Aaqqissuussineq, Danmarkimi napparsimmaviit immikkoortortaasa, siunissami nunatsinni Peqqinnissaqarfimmi atorfinnik arlalinnik inuttaliinissaannik nassataqartussaq pillugu isumaqatigiissut nutaaq aqqutigalugu, tamanna pissaaq.
Siunissaq ungasinnerusoq isigalugu nunatta Danmarkillu aalajangersimasumik siunnerfilimmik anguniagaqarlutik suleqatigiinnerannut, nunatsinni Peqqinnissaqarfiup nukittorsarnissaanik ukkassiviusumut, isumaqatigiissut pingaarutilittut ilaavoq. Illuatungeriit Danmarkimi napparsimmavinni immikkoortortanik, ilaatigut pinasuagassanut, ernisunut tarnikkullu nappaatilinnut tunngatillugu aaqqissuussinerup siammarneqarnissaanut peqataarusuttunik nassaarniarneq, maanna aallartippaat.
Aaqqissuussineq Danmarkimi nunatsinnilu immikkoortortani ilinniagaqassutsikkut ineriartornermik ikorfartuissaaq napparsimasunullu iluaqutaasussamik nunatsinni Peqqinnissaqarfimmi sulisoqarniarneq aalajaannerusunik toqqammavisseeqataaffigissallugu.
Peqqissutsimut Inunnullu Innarluutilinnut Naalakkersuisoq Anna Wangenheim ima oqarpoq:
”Isumaqatigiissuteqartoqarnera nuannaarutigaara. Nunatsinni napparsimasunut patajaannerulersitsinissamik qulakkeerivoq tamatumalu peqatigisaanik ataavartitsinerulerneq piginnaasallillu amerlinerat pissutigalugit, sulinermi aqutsisunut sulisunullu pitsaanerusunik atugassiissalluni. Tamatuma peqatigisaanik aaqqissuussineq ilisimasanik misilittakkanillu, Danmarkimi nunatsinnilu sulisut akornanni inerisaanissamut paarlaasseqatigiinnissamullu periarfissiivoq. Tamanna ataatsimoornermik pilersitsivoq nutaanillu periarfissiilluni.”
ukiuni kingullerni Danmarkimi nunap qitiusumik immikkoortuini napparsimmavinnilu aaqqissuussinermik isumaqatigiissuteqarfigisatigut Nunatsinni Peqqinnissaqarfik misilitagaqalerpoq. Isumaqatigiissutit arlalitsigut napparsimasut aqqusaartugassaannik ataqatigiinnerulersitseqataanerat immikkoortullu akimorlugit ataqatigiissaarinernik nukittorsaanerat, misilittakkat takutippaat.
Sulisut Danmarkimeersut nikittaallutik nunatsinnut suliartortassapput
Aaqqissuussinermi nutaami aaqqissuussinerit pineqartut, nunatsinni Peqqinnissaqarfimmit pisariaqartitanik aalajangersimasunik pingaarnersiuillunilu nalunaaruteqartumit pilersinneqassapput. Tamatuma kingorna Danmarkimi immikkoortortamit aaqqissuussinermi peqataasumit nunatsinni atorfik inuttalerneqassaaq.
Taamaalillutik sulisut nunatsinni Peqqinnissaqarfimmi atorfimmi pineqartumi nikittaallutik atorfinittassapput. Taamaaliornikkut piffissami isumaqatigiissutaasumi nunatsinni sulisoqartuarnissaa qulakkiissavaat.
Peqqinnissakkut sullissisut nunatsinni Peqqinnissaqarfimmit akissarsiaqartinneqassapput. Danmarkimi naalagaaffik aaqqissuussinermi peqataanermut tapisiaqartitsissaaq.
Danmarkimi napparsimmaviit immikkoortortaanni aaqqisuusinermi peqataaneq nammineq piumassutsimik tunngaveqarpoq, sulisullu tamatumani peqataasut piffissaq isumaqatigiissutaasoq naappat Danmarkimi atorfimminnut utissapput.
Danmarkimi nunap qitiusumik immikkoortuini siulittaasoq Mads Duedahl ima oqarpoq:
”Aaqqissuussineq nunatsinni Peqqinnissaqarfiup Danmarkimilu Peqqinnissaqarfiup annertuumik tatigeqatigiinnerannut qanimullu suleqatigiinnerannut takutitsisuuvoq. Nunatsinni Peqqinnissaqarfimmik nukittorsaaqataarusuppugut, Danmarkimi nunap qitiusumik immikkoortuini sulisut inerisaaqataanissamut ataavartitseqataanissamullu periarfissinneqarnissaat nuannaarutigeqaara. Aaqqissuussineq aqqutigalugu Kalaallit Nunaanni innuttaasunut sunniuteqarnissarput neriuutigaarput.”
Danmarkimi nunap qitiusumik immikkoortuini siulittaasup tullia Lars Gaardhøj ima oqarpoq:
” Aaqqissuussinerup aallartinnissaa qilanaaraarput, periutsimillu peqqinnissakkut sullissisut danskit suli amerlanerusut nunatsinnukarlutik suleqataanissaannut kajungilersitsisinnaasumik nassarsimanissarput neriuutigalugu. Ukiorpanni misilittagaareersut annertusarpagut, kalaallit nunaanniilli Danmarkimiillu aaqqissuussinerup nalimmassartuartariaqarnissaa ilisimaaraarput tamannalu pissaaq qanimut naligiimmillu suleqatigiinnikkut. Periutsimik Kalaallit Nunaanni peqqinnissaqarfiup sulisut Danmarkimeersut qanoq ikiuulluarsinnaanerannik ersarissumik tikkuussisinnaaneranik nassaarsimanerput nuannaarutigaara.”
Qanimut suleqatigiilluni aaqqissuussineq
Suliani ataasiakkaani aqqissuussineq, Danmarkimi nunatsinnilu immikkoortortat qanimut suleqatigiinnerisigut ingerlanneqassaaq. Aaqqissuussinermi atorfinitsinneqartartussat tassaapput nakorsat, peqqissaasut allallu. Aaqqissuussineq Dronning Ingridip Napparsimmavissuanut sinerissamilu napparsimmavinnut atuutissaaq.