Sikuki Nuuk Harbour A/S 22. maj 2026 ileqquusumik ataatsimeersuarpoq. Suliffeqarfiup ukioq ukiumi angusatigut 14,1 mio. kr.-inik angusaqarfiusoq, annertuumik ingerlatsiviusoq kiisalu umiarsualiviup allilerneqarnissaanik aallartitsiffiusoq kingumut qiviarsinnaavaa.
Angusaq naammagisimaarnartoq
Sikuki Nuuk Harbour A/S-ip 2025-imi kaaviiaartitani ilanngaatissat ilanngaatigereerlugit 75,1 mio. kr.-it angusimavai, 2024-mi 73,9 mio. kr.-iusimallutik, akileraarutillu akilereerlugit angusat 14,1 mio. kr.-iusimallutik. Angusat ingerlatsinerup qaffasinnerusumik ingerlanneqarneranit kiisalu umiarsualiviup allilerneqartussaaneranut atatillugu aningaasaliinermut aningaasartuutinit sunnerneqarsimapput.
Ataatsimeersuarnermi 2025-imut ukiumoortumik nalunaarut piginnittunit akuerineqarpoq.
Umiarsuit talittarneri, ESG aamma umiarsualiviup allilerneqarnera
2025-imi Nuummi umiarsualivimmut pilersuinermut umiarsuit, kilisaatit, takornariartaatit kiisalu Illersornissaqarfiup umiarsuaataasa talittarnerat oqaluttuarisaanermi aatsaat taama qaffasitsigisimavoq. Piujuartitsinermut tunngasutigut suliffeqarfiup 2025-imi siullermeerluni avatangiisit, inooqataanikkut pissutsit aqutsinerlu (ESG) pillugit nalunaarusiorneq tamakkiisoq naammassivaa, ukiumoortumik nalunaarusiamut ilanngunneqarsimasoq.
Umiarsualiviup allilerneqarnissaanut suliariumannittussarsiuussineq ingerlanneqarsimavoq, aammalu Nuummi umiarsualiviup allilerneqarnissaanut KJ Greenland A/S-imut isumaqatigiissut atsiorneqarsimavoq.
“Suliffeqarfik siunissamut pitsaasumik piareersimavoq, aammalu umiarsualiviup allilerneqartussaanera qilanaaralugu, tamannalu umiarsualiviup naammassisaqarsinnaassusianik, upalungaarsimanermik Nunattalu imarsiornermi attaveqaasersuutaanik nukittorsaasussaavoq. Umiarsualiviup allilerneqarnera 2028-mi novemberimi piareernissaa naatsorsuutigineqarpoq.” – Steen Montgomery-Andersen, siulersuisut siulittaasuat.
Siulersuisut qinigaaqqipput
Ataatsimeersuarnermi siulersuisut qinigaaqqipput, taakkulu suli tassaapput:
Steen Montgomery-Andersen, siulittaasoq
Ujarak Rosing Petersen,
Heidi Jeremiassen
Marie Louise Frederiksen
Thomas Bendtsen