Nuummi meeqqat inuusuttullu sapaatip-akunnerani 43-mi Pikialaarfik ingerlanneqalerpat, namminneq pilersitsisinnaanerminnik misileraanissamut periarfissaqassapput.
Kommuneqarfik Sermersooq aamma Kulturip Illorsua Katuaq Pikialaarfimmik aaqqissuussisuupput. Pikialaarfiup meeqqat inuusuttullu eqqumiitsuliornermi assigiinngitsunik periaatsinik misileraanissaannut allanillu peqateqarlutik pilersitsinerup nuannersortaanik misigisaqarnissaannut periarfissinnissaat siunertaraa.
Sapaatip-akunnerata ingerlanerani Nuummi sumiiffinni assigiinngitsuni sammisassaqartitsisoqassaaq. Ilaatigut bogmærkiliornermik kiinnamillu qalipaanermik workshoppertitsisoqarlunilu pikkorissartitsisoqassaaq, kiisalu tusarnaartitsisoqassalluni, eqqumiitsulianik saqqummersitsisoqassalluni atisanillu takutitsisoqassalluni.
Pikialaarfik Katuami Ammaanersiornermik pisortatigoortumik ammarneqassaaq.
Najukkami kulturilerisut sunngiffimmilu susassaqartitsisut arlallit sammisassanik pilersitseqataassapput. Taakkununnga ilaapput Allunnguaq, Allattarl’, Nunatta Atuagaateqarfia, Musikskolen, NAPA, sunngiffimmi susassaqartitsiviit aamma Kittat.
Meeqqat inuusuttullu sapaatip-akunnerata ingerlanerani suliaat Katuami saqqummersinneqassapput.
Ukiut tamaasa ingerlanneqartassaaq
Pikialaarfik ataasiarluni taamaallaat ingerlanneqartussaanngilaq. Kommuneqarfik Sermersooq aamma Katuaq ukiuni pingasuni isumaqatigiissuteqarput, isumaqatigiissullu naapertorlugu Nuummi meeqqat inuusuttullu ukiumut ataasiarlutik sapaatip-akunnerani ataatsimi eqqumiitsuliornermik kulturimillu sammisaqarnissamut periarfissinneqartassapput.
Meeqqat inuusuttullu eqqumiitsuliornermik kulturimillu paasinninnerisa kiisalu taakkuninnga naleqartitsinerisa annertusarnissaat Pikialaarfiup siunertaraa, Katuaq tusagassiuutinut nalunaarummi ilisimatitsivoq.
