STARK Kalaallit Nunaat A/S CSR Greenland-imi ilaasortaavoq. Taassuma siunertaraa Kalaallit Nunaanni CSR-ip pilersaarutaanik siuarsaallunilu piviusunngortitsisarnissaq, isumagissaraalu suliffeqarfiit qanitaminni pisussaaffeqarlutik ineriartortitseqataanissaat inunnik isumaginninnerup, avatangiisinik mingutsitinaveersaarnerup ileqqorissaarnerullu tungaasigut.
STARK Kalaallit Nunaat A/S -ip immikkut pingaartitarai meeqqat inuusuttullu navianartorsiortut. Tamatuminnga pimoorussinerata ersernerisa ilagaat inunnik isumaginninnermi sulianut ukiumoortumik tunissuteqartarmata.
STARK Kalaallit Nunaat A/S-ip tunissutaa Kangerluani illuaqqatta aserfallatsaalineranut atorneqassooq. Illuaraq taanna perorsaanermik peqqissaanermillu siunerataqarluta sulinitsinni pingaaruteqarlunilu qitiulluinnartuuvoq.
Meeqqat Angerlarsimaffiat Sikkerneq imminut pigisuuvoq 2010-mi pilersinneqarluni. Sulinermi aallunneqarput meeqqat 0-mit 18-nut ukiullit mikinerminni suusupagineqarsimanermik kinguneranik misigissutsimikkut innarlerneqarsimasut, taamaattumillu sivisuumik inissittariaqartut perorsarneqarlutik peqqissarneqarlutillu.
STARK Kalaallit Nunaat A/S-imut qujanarujussuaq.
Lotte Østergaard, Meeqqerivissuaq Sikkerneq pisortaa