Savaaqqat toqorarneqareeraangamik normui immikkoorsinneqartarput ilaalu ukiup tullianut atoqqinneqartarlutik. Savaateqarfinnut utertinneqartinnagit salinneqartussaapput immikkoortiterneqarlutillu – tassanilu Sulisartut Højskoliani atuartut ikiuutaapput.
Salitassat immikkoortiterneqartussallu amerlammata ilinniartut aalajangersimasumik periuseqarlutik suliarisimagaat ilinniartitsisup, Bonna Motzfeldtip oqaluttuaraa.
– Tikka sakkortugamik Sulisartut Højskoliata kiileriani suliarineqarput. Ilinniartut ilai sorlutik køkkenrullimik asserlugit saliipput. Ilai normunik immikkoortiterisut, allat saliisut – ukusartilerlutik amikunik piiaasut. Suliarinerini nuannisarujussuarput – allaat savaateqarfinni praktikkerusuttoqalerluni, Bonna Motzfeldt oqaluttuarpoq.
Savat normui salinnerini atuartut 17-iusuni arfineq-pingasut savaateqarfinni suliffimmik misiliipput – nuannisarujussuarsimallutillu. Atuartoq ataaseq savaateqarfimmi ulapaarfiup nalaani suliffittaarpoq.
Suliniutit taamaatut annikitsut isumalerujussuusinnaapput, sumiluunniimi suleqatigiinneq arlaatigut nuannersumik ineriartorfiusarmat.
Sulisartut Højskoliani atuartut maanna naammassereerlutik angerlakaasimalerput – atuartut qutsavigaagut taama suleqataalluartigisinnaammata.
Tusagassiuutinut nalunaarut Innovation South Greenland-imit