Qasigiannguani utoqqaat amerlanerit ullumikkut isumassorneqarnermik aammalu sullissinermut atatillugu naapertuutinngitsumik misigisarlutik oqariartuuteqartarput. Taamaattumik Siumut isumaqarpoq pisariaqartoq innuttaasut aammalu utoqqaat pitsaanerusumik tusarneqarnissaat kiisalu sullissinermi ersarissumik pilersaaruteqartoqarnissaa.
Siumut immikkoortortaqarfia naapertorlugu utoqqaat inuiaqatigiinni pingaarutilimmik inissisimapput, taamaattumillu ataqqinnittumik toqqissisimasumillu inuuneqarnissaat kommunimit qulakkeerneqartariaqarluni.
Allakkat ammasut aqqutigalugit immikkoortortaqarfiup ilaatigut uku apeqqutigai:
- Kommune Qeqertalik utoqqaat pillugit immikkut politikkimik peqarpa?
- Utoqqarnut politikki qanoq innuttaasunik peqataatitsilluni ineriartortinneqassava?
- Utoqqaat sullinneqarneranni sulisut atugaat aammalu atorfinitsitsiniarneq qanoq pitsanngorsarneqassava?
- Kommunalbestyrelsi aammalu borgmesteri qanoq iliuuseqarnissamut pilersaaruteqarpat?
Qasigiannguani Siumut kaammattuivoq kommuni innuttaasunik ammasumik oqaloqateqarnissamut aammalu utoqqaat pillugit siunissamut tunngatillugu ersarissumik anguniagaqalernissamut.
Tusagassiuutinut nalunaarut Aqqa Samuelsenimit, Siumut