DMI nutaamik periusissamik misiliivoq, tassani issitumi pinngortitamut eqqaaneq annikillisarniarlugu. Kalaallit Nunaata avannaata kangiani Danmarkshavnimi silasiorfiup eqqaani mikisunik timmisartunik motooreqanngitsunik atuilluni radiosondinik qaffasissumi missingersuiartortitsereernermi isumannaatsumik utertinnissaannut misiliuteqassaaq.
Radiosondit nalinginnaasumik qullartaasianik silasiutinik nassiunneqartarnikuugaluarput, tassani kissassuseq, isugutak, silaannaap naqitsinera aamma anori missingersorneqartarlutik. Paasissutissat Nunarsuaq tamakkerlugu silassami atorneqartarput, silassallu qanoq innissaanut eqquinissamut pingaaruteqarlutik.
Qullartaasiarli qaffasissumiitilluni qaarpat, atortorissaarut sumut tamaangaannaq nakkassaaq. Tamanna isumaqarpoq, plastikki, elektronikki batteriillu pinngortitami eqqagassanngortartut.
Nassiussuiffiup eqqaanut missaaq
Misiliutissaq nutaaq tassaavoq, timmisartuaqqamut motooreqanngitsumut radiosondi ikkunneqassasoq. Timmisartuaraq motooreqanngitsoq 250 grammit missaanni oqimaassuseqarpoq, skumminillu sanaajulluni motooreqaranilu timmisartortartoqanngitsoq.
Qullartaasiaq 30 kilomiiterisut qaffasitsigaluni timmisartuaraq motooreqanngitsoq katatsissavaa, timmisartuararlu aqunneqarluni aarsaarusaarluni silasiorfiup eqqaanut mikkiartuaarusaassaluni. Taamaasilluni timmisartuaraq motooreqanngitsoq aamma radiosondi ajoquserani utissaaq atorneqaqqissinnaallunilu.
“ Siullermik atortorissaarutitsinnik pinngortitaq innarlernaversaassavarput. Aningaasatigut annikitsuinnarmik sipaaruteqassaagut, una misiliineq iluatsissappat. Iluatsissagutsigu sodinik misiliineq ingerlateqqissavarput, silaannarmilu ozoni missingersorlugu misiliuteqarluta – taamaasiorneq aningaasatigut allaanerujussuuvoq,” Jacob L. Høyer, DMI’p Silaannarmik ilisimatuutut misissuinermi qaammataasianik ilisimatuutut misissuisartut aamma Issittumi misissueqqissaartarfimmeersoq, oqaaseqarpoq.
Misiliineq Danmarkshavnimi ingerlanneqassaaq, taannalu Kalaallit Nunaata Avannaani aamma Kangiani inissisimalluni. Tassani sulisut radiosondinik ukioq naallugu ullormut marloriarlutik nassiussisarput. Tamanna ukiumut qullartaasiat 730-t missaanni amerlassuseqarpoq.