Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Naalakkersuisut 2027-mut ukiunullu tulliuttunut aningaasanut inatsisissatut siunnersuutaanni Tasiilami illumik ilinniartitsivimmik pilersitsinissamut aningaasaliissuteqarnissaq siunnersuutigaat.
Illoqarfimmi innuttaasut suliniummik taamaattumik ukiorpassuarni kissaateqarsimapput. Ilinniartitaanermut, Kultureqarnermut, Timersornermut Ilageeqarnermullu Naalakkersuisup Nivi Olsen-ip nuannaarutigaa illup ilinniartitsiviup piviusunngortinneqarsinnaanera maanna ilimanaateqarmat.
”Tunumi ilinniagaqarnissamut periarfissat pitsaanerusut qulakkeerneqarnissaat pingaartitarivarput, ilinniagaqarusuttut angerlarsimaffimminnit ilaquttaminnillu qimaguttariaqannginniassammata. Taamaattumik illumut ilinniartitsitsivimmut, ilinniartitaanernut pioreersunut nutaanullu sinaakkutaasinnaasumut, aningaasaliissuteqarnissap maanna siunnersuutigineqarnera nuannaarutigeqaarput,” Nivi Olsen oqarpoq.
Tunumi ilinniagaqarnissamut soqutiginninneq annertuvoq
Tunumi ilinniagaqarnissamut soqutiginninneq annertuvoq. Tamanna 2026-mi upernaakkut siunnersortit ikiortaattut ilinniagaqartut 19-it Tasiilami naammassimmata ersarissumik takuneqarsinnaavoq.
Ilulissani Perorsaanermik Ilinniarfiup Kommuneqarfik Sermersuullu suleqatigiinnerisigut Tasiilami ilinniartut holdiat pilersinneqarpoq.
Naalakkersuisup nuannaarutigaa illumik ilinniartitsivimmik pilersitsineq sumiiffimmi ilinniartitaanernut kiisalu piginnaasanik qaffassaanissamut pikkorissarnernut piginnaasaqalersitsisinnaasunullu periarfissanik amerlanerusunik ammaassissammat.
”Piffissami aggersumi kommuni suleqatigalugu ilinniartitaanerit, piginnaasanik qaffassaanissamut pikkorissarnerit piginnaasaqalersitsisinnaasullu suut pisariaqartinneqarnersut qulaajassavarput. Peqatigisaanik illup ilinniartitsiviup pilersinneqarnissaa qulakkiissavarput. Suliaq pingaaruteqarpoq, qilanaaralugulu suliarissavarput,” Nivi Olsen oqarpoq, nangillunilu:
”Naalakkersuisut ungasissumit atuartitseriaatsimut iliuusissatut pilersaarutaat nutaaq aamma ilinniartitsinermik najuulluni alimasissumiillu peqataaffiusumik misilittakkat pitsaasut tunngavigalugit, Tunumi ilinniagaqarnissamut periarfissat siornatigut sanilliullugit amerlanerujussuit ammaanneqarput – inuussutissarsiutinut ilinniartitaanerni aamma ingerlaqqiffiusumik ilinniartitaanerni.”
