Allagartartaartut ilinniagartik modulinut tallimanut agguarsimasoq ukiuni marlungajanni ingerlatereerlugu ilaqutariinnik aqqutissioqatigiinnermik ingerlatsisinnaanngorlutik tallimanngornermi maajip arfineq pingajuanni allagartartaassutigaat. Tamanna annertuumik Kommune Kujallermut alloriarerusoq borgmesteri isumaqarpoq.
-Nuannaarutigaara ilaqutariinnut aqqutissioqatigiinnermik ingerlatsisinnaasunik kommunitsinni pisuujunerulernerput, alloriarneruvoq annertooq, allagartartaartut qamanngavik pilluaqqungaarpakka. Suleriuseq ingerlassinnaanngugaat kommunitsinni pingaaruteqarluinnarpoq, ajornartorsiutimmi annertusivallaannginnerini ilaqutariinnik aqqutissioqatigiinneq aallaavigalugu pitsaanerusumut saqisitsisoqarsinnaavoq. Taamaattumik allagartartaartut sulilluarnissaannut isumalluarlunga neriuuteqarpunga, Malene Vahl Rasmussen oqarpoq.
Ilaqutariinnut aqqutissioqatigiinneq periusaavoq meeqqap ineriartornerani ilaqutariinniluunniit ajornartorsiortoqartillugu neqeroorutaasinnaasartoq. Ilaqutaasut, inuilluunniit meeqqap inuuneranni pingaaruteqartut peqataatillugit ilaqutariinnut aqqutsissiuussisoqartarpoq meqqap ilaqutariillu pitsaanerusumik inuuneqarlernissaat siunertarineqarluni.
Ilinniagaq ukiunik marlungajannik sivisussuseqartoq Isumaginnermut aqutsisoqarfiup ingerlataraa.
Allagartartaartunit 18-usunit tallimat sulinertik peqqutigalugu assimi ilaanngillat.