Ulluni makkunani Avannaata Kommuniani innuttaasut 20-t takornariaqartitsinermik inuussutissarsiuteqalerumallutik piareersaleruttorput. Ilulissani ulloq 30. maaji tikillugu 12-paxinut pikkorissartinneqarput, tassani Kalaallit Nunaata sineriaani angallassinermi aamma takornarialerinermi piginnaanngorsarluni pikkorissaaneq ingerlanneqarmat.
Pikkorissaaneq Majoriaq aamma Avannaata Kommuniata suleqatigiinneranik aaqqissuunneqarsimavoq, imarsiornermillu atuarfimmit ilinniartitsineq ingerlanneqarsimalluni. Uani pikkorissaqataasut ilaatigut motoori, sumiissusersiorsinnaaneq, imarsiorluni maleruagassat aamma ulorianartunik nassiussanik aqutsineq pillugit ilinniartinneqartarput.
Ilinniartitsineq AMA-pikkorissarnertut naammassineqartarpoq, aamma kommunimit tapiissutilimmik misiliutitut iluarsartuullugu pilersaarusiaalluni. Avannaani imarsiornermi piginnaasanik pitsanngorsaanissaq aamma inuttaasut takornariaqartitsinermi inuussutissarsiuteqarnissaannut periarfissaqarnerulernissaat anguniagaavoq.
Borgmesteri peqataasussat siammasissumeernerat nuannaarutigaa
Borgmesteri Lars Erik Gabrielsenip pikkorissartut pulaarpai, tassanilu peqataasut nunaqarfinnit illoqarfinniillu allanit Ilulissanut peqataajartorsimanerat nuannaarutigalugu.
“Pikkorissariat illoqarfinniit nunaqarfinniillu allaneernerat nuannaarutigaarput. Kissaatigaarpummi amerlanerusut ilinniarnissaminnut ineriartornissaminnullu assigiimmik periarifssaqartalernissaat. Amerlasuut soqutiginnillutik peqataasut takullugit nuannareqaara,” borgmesteri oqaaseqarpoq.
Sumiiffimmi nutaanik periarfissanik pilersitsiniaraanni suleqatigiinnissap pingaaruteqassusaa aamma ersarissaatigaa.
“Pisariaqartippatsigit, ajunnginnerpaamillu kissaappassi,” Lars Erik Gabrielsen oqarpoq.
Aasarnissaanut piareersimaneq
Pikkorissarneq inissinneqarsimavoq, pikkorissarlutik naammassigunik pikkorissartut aasaanerani ulapaarfimmi sulilersinnaalernissaat, tassani takornarialerinermi angallassinermilu piumasaqaatit malillugit sulisinnaasut pisariaqartinneqarmata.
Borgmesteri malillugu nunaqavissunik takorialerinermut tunngasunik ilinniarsimasoqalernissaa pingaaruteqarpoq.
“Takornariaqartitsinermi amerlanerit ilinniagaqarnissai pingaaruteqarpoq, Avannaanilu innuttaasut amerlanerit pikkorissarnissaannut periarfissaqarnerunissaat pisariaqartinneqarluni, tassani inuussutissarsiorneq pitsanngorsarneqarniassammat,” taamak oqaaseqarluni naggasiivoq.