Kommune Kujallermi borgmesterip Malene Vahl Rasmussenip aamma Meeqqanut, Inuusuttunut, Inatsisit atuutsinneqarnerannut Naligiissitaanermullu Naalakkersuisup Mariane Paviasen Jensenip susassaqarfiup akunnerminni aaqqiagiinngissutaasimasup qaninnerusumik ataqqeqatigiiffiusumillu suleqatigiiffiunissaa siunniuppaat.
– Susassaqarfik Naalakkersuisunit maanna oqartussaaffigineqartoq pillugu qaninnerusumik suleqatigiinnissaq anguniarlugu ataqqeqatigiinnerusumik suleqatigiinnissamik siunnerfeqarpugut. Tamanna akunnitsinni suleqatigiinnermik nukittunerusumik nassataqassasoq, minnerunngitsumillu innuttaasunut sullinneqartunut toqqissisimanermik pilersitsinissaa neriuutigaara, borgmesteri Malene Vahl Rasmussen oqarpoq.
Susassaqarfiup Naalakkersuisunit oqartussaaffigineqalersimasup siunissami kommunimit tigoqqinneqarnissaanut torersumik sinaakkusiorneqarnissaa, suleqatigiissutigilluarneqartariaqartoq aamma siunniunneqarpoq.
-Akisussaaffiup kommunimiit tigoqqinneqarniissaa siunissami pisussaq eqqarsaatigalugu torersumik pilersaarusiorluakkamillu sulisoqarnissaa siunniussatta ilaagaat. Innuttaasunummi, sulisunut, politikkerinullu ersarissumik sinaakkusiorluarneqarnissaa pisariaqarluinnarmat. Ataqqeqatigiiffiusumilli sulineq maanna aallartissavarput, ajornartorsiutit pilertinnagit suleqatigiinneq nukittooq pigerusullugu, Malene Vahl Rasmussen oqarpoq.
-Innuttaasut pillugit sullissisuuvugut, suliatta ataatsimik anguniagaqarfiunera puigorneqassanngilaq, tassaammammi innuttaasut pitsaanerusumik atugassaqalernissaanik anguniagaqarneq. Pisortaqarfinni sullissineq toqqissisimasumik, torersumik ataqqeqatigiiffiusumillu ingerlanissaa pingaaruteqarluinnarmat suleqatigilluartariaqarpugut, taamaattumik politikkikkut aqutsisutut kivitseqatigiinnissarput pisariaqarluinnarpoq. Tamannalu anguniarlugu borgmesteri ataatsimeeqatigiartornikuuara assullu marluulluta isumaqatigiittugut, siunnerfigullu imminnut qanittuaraasut paasinarsivoq, siunissami suleqatigiilluarnissarput qilanaaraara, Naalakkersuisoq Mariane Paviasen Jensen oqarpoq.
Borgmesteri Malene Vahl Rasmussen aamma Naalakkersuisoq Mariane Paviasen Jensen pingasunngornermi apriilip 29-anni Qaqortumi ataatsimeeqatigiipput.