Kommunimi aningaasaqarnermik aqutsinermi misilittagaqarpit, aamma aningaasaqarnermik suliaqarnermi allat peqataatinneqarnissaat soqutiginnilersinneqarnissaallu piginnaasaqarfigaajuk?

Kommune Qeqertalik controllerinik marlunnik pissarsiorpoq, ingerlatsivitsinni nutaani aningaasaqarnermik aqutsinerup pilersinneqarnissaanut ineriartortinneqarnissaanullu peqataasussanik.

Sulisussanik aningaasaqarnermik patajaatsumik paasinnittunik, aammalu missingersuutinut akisussaasut peqataatinnissaat piginnaasaqarfigalugit pissarsiorpugut. anguniagaraarput aningaasaqarnermik aqutsineq ineriartortissallugu, taamaalillutik aqutsisut ataasiakkaat missingersuutitik takussutissaqartuaannarnagit, aammali namminneq aningaasaqarnermik aqutsinermut eqeersimaarlutik peqataaneq soqutiginartutut pissarsiffiusutullu misigisassagaat.

Tamanna controllerinik tatiginnilersitsisinnaasunik, aningaasaqarnermik paasiuminartumik ingerlatitseqqiisinnaasunik, ingerlatsivinnilu pisortanut missingersuutinullu akisussaasunut pitsaasumik sparringpartneriusinnaasunik pisariaqartitsivoq.

Atorfiit pillugit

Kommune Qeqertalimmi aningaasaqarnermut immikkoortortaqarfimmi qitiusumik atorfeqassaatit, tassani controlleri alla naatsorsuutinillu suliaqartut marluusut peqatigalugit aningaasaqarnermut ataatsimoortumik suleqatigiinnut ilaasassaatit, naatsorsuutinut pisortaq toqqaannartumik qullersaralugu.

Controllerit misilittakkatik tunngavigalugit ingerlatsivinnut ataasiakkaanut attuumassuteqartinneqassapput.

Suliassatit pingaarnerit tassaassapput ingerlatsiviup immikkoortortaqarfiini suliffeqarfiutaanilu aningaasaqarnermik aqutsinerup pilersinneqarnissaa ineriartortinneqarnissaalu, ingerlatsivimmi pisortaq missingersuutinullu akisussaasut qanimut suleqatigalugit.

Missingersuutinut akisussaasut qaammammut ataasiarlutik immikkoortortaqarfimminni aningaasaqarnerup malitseqartinneqarnissaanut ikiussavatit, tamatumani missingersuutinut sanilliullugu nikingassutit misissorlugit, naatsorsuutigisanik prognosenik suliaqarneq aammalu ukiup naanerani naatsorsuutigisamik inernerusussamik naliliineq ilanngullugit.

Immikkoortortaqarfiit aningaasaqarnikkut malitseqartitsinerat ingerlatsiviup suliassaqarfiinut assigiinngitsunut immikkoortillugit nalunaarusianut katersorneqassaaq, taakkulu kingorna ingerlatsiviup qaammatikkaartumik ataatsimoortumik aningaasaqarnikkut nalunaarusiaanut tunngaviussapput.

Ingerlatsivimmi pisortaq ataatsimoortumik nalunaarusiamut akisussaasuuvoq, illillu controlleritut nalunaarusiap suliarinerani pitsaassusaanillu qulakkeerinninnermi ingerlatsivimmi pisortaq missingersuutinullu akisussaasut qanimut suleqatigalugit ikiuuttassaatit.

Ingerlatsiviit aningaasaqarnikkut nalunaarusiaat aningaasaqarnermut ingerlatsivimmut tunniunneqassapput. Taassuma nalunaarusiat ingerlatsiviillu namminneq oqaaseqaataat atorlugit kommunip ataatsimoortumik aningaasaqarnikkut nalunaarusiaa suliarissavaa. Ingerlatsiviit nalunaarusiaat ataatsimoortumik nalunaarusiamut ilanngussatut ilanngunneqassapput, aammalu ingerlatsiviup ataatsimiititaliaanut nassiunneqassallutik.

Suliassatit pingaarnerit

·Missingersuutinut akisussaasut qaammatikkaartumik immikkoortortaqarfimminni suliffeqarfiutaannilu aningaasaqarnikkut malitseqartitsineranni ikiortassavatit.

·Missingersuutinut akisussaasut missingersuutinik paasinninnermik, aningaasaqarnikkut malitseqartitsinermik, prognosenik aammalu aningaasaqarnermik aqutsinermut sakkunik atuinermik ilinniartitsillutillu ilitsersortassavatit.

·Missingersuutinut akisussaasut soqutiginninnerannik piginnittutut misiginerannillu pilersitseqataassaatit, taamaalilluni aningaasaqarnermik aqutsineq ulluinnarni aqutsinermut pissusissamisoortumik pingaaruteqartumillu ilaalersillugu.

·Ingerlatsiviup immikkoortortaqarfinnut nalunaarusiaasa aammalu ataatsimoortumik aningaasaqarnikkut nalunaarusiaata suliarineqarneranut ikiuutissaatit, tamatumani nammineq aningaasaqarnikkut misissueqqissaarnernik, prognosenik naliliinernillu suliaqarsinnaassallutit.

·Ingerlatsivimmi pisortamut aningaasaqarnikkut eqeersimaartumik sparringpartneriusassaatit, aningaasaqarnikkut ineriartornerup paasineqarnissaanut, aarlerinaataasinnaasut aammalu aaqqiissutissatut iliuuseqartariaqarnerup suussusersineqarnissaanut peqataassallutit.

·Ingerlatsiviup missingersuusiorneranut ingerlaavartumillu aningaasaqarnermik aqutsinerup ineriartortinneqarneranut tapersersuisassaatit.

·Aningaasaqarnermut immikkoortortaqarfiup sulisui allat suleqatigalugit naatsorsuutinik nalunaarsuinerup pitsaassusaa qulakkiissavat, ilaatigut kontunut eqqortumik nalunaarsuineq, piffissamut eqqortumik inissiineq kiisalu naligiissitsinerit, taamaalillutik aningaasaqarnikkut nalunaarusiat naatsorsuutinut paasissutissanik eqqortunik tutsuiginartunillu tunngaveqassallutik.

Kinaavit?

Siullermik pingaarnertullu kommunimi aningaasaqarnermik aqutsinermi sulinikkut misilittagalinnik, ajornanngippallu atorfinni siusinnerusuni angusanik uppernarsarneqarsinnaasunik peqartunik pissarsiorpugut.

Annertuumik iluaqutaassaaq kommunimi ingerlatsivimmi siusinnerusukkut aningaasaqarnermut akisussaasuuguit, aammalu nammineq aningaasaqarnikkut nalunaarusianik, missingersuutinik malitseqartitsinernik, prognosenik aningaasaqarnikkullu misissueqqissaarnernik suliaqarnermik misilittagaqaruit.

Immikkut pingaartipparput missingersuutinut akisussaasunik aningaasaqarnermik aqutsinermi ilinniartitsinermik peqataatitsinermillu misilittagaqarnissat, aammalu aningaasaqarnikkut ataqatigiissutsit paasiuminartumik ingerlateqqissinnaanissaat.

Inuit naligiilluni naapissinnaassavatit, tatiginniffiusumik suleqatigiinnermik pilersitsisinnaassallutit aammalu aqutsisut sulisullu namminneq immikkoortortaqarfimminni aningaasaqarnermik eqeersimaarlutik suliaqarnissaat kajumissaarisinnaassallugu.

Excelimik atuinermik pitsaasunik piginnaasaqarputit, aamma Power BI-mik imaluunniit nalunaarusiornermut sakkunik assingusunik misilittagaqaruit iluaqutaassaaq.

Aamma qinnuteqartunik suli assingusumik nammineerluni aningaasaqarnermut akisussaaffeqarsimanngitsunik, kisianni atorfiup iluani ineriartortinnissamut fagligt inuttullu piginnaasaqarlutik takutitsisimasunik soqutiginnippugut.

Sulinikkut misilittakkat, angusat uppernarsarneqarsinnaasut aammalu pitsaasunik innersuussisoqarsinnaaneq ilinniagaqarnermit pingaartinnerupput.

Neqeroorutigaavut

Aningaasaqarnermut suleqatigiinnut mikinerusunut ilaalissaatit, nammineerlutit akisussaaffeqarfiusumik suliaqarlutit aammalu Kommune Qeqertalimmi aningaasaqarnermik aqutsinerup ineriartortinneqarneranut sunniuteqarnissamut periarfissaqassallutit.

Ingerlatsiviit aqutsisuisa missingersuutinullu akisussaasut suleqatigineranni qitiusumik inissisimassaatit, misilittakkatillu atorlugit kommunip aningaasaqarnermik aqutsinerani tigussaasunik ataavartunillu pitsanngorsaassallutit.

Akissarsiat atorfinitsitaanermilu atugassarititaasut

Atorfiit piffissaq tamakkerlugu atorfiupput, piaarnerpaamik imaluunniit immikkut isumaqatigiissuteqarnikkut atorfinitsitsisoqassalluni.

Akissarsiat atorfinitsitaanermilu atugassarititaasut isumaqatigiissutit atuuttut naapertorlugit aalajangersarneqassapput, aammalu piginnaasatit, sulinikkut misilittakkatit, angusatit uppernarsarneqarsinnaasut kiisalu innersuussinerit ataasiakkaarlugit naliliiffigineqassallutik.

Akissarsiat inaarutaasumik inissinneqarnissaat atorfimmi akisussaaffik, piginnaasatit, misilittakkatit aammalu akissarsiat pillugit naatsorsuutigisatit eqqarsaatigalugit isumaqatigiissutigineqassaaq.

Sumiiffik: Aasiaat – kommunili tamakkerlugu sullissineq

Paasissutissat annertunerusut: naatsorsuutinut pisortaq suligasuartoq Ole Albinus, oqarasuaat +299 582737

Pinerliisimannginnermut uppernarsaat:

Atorfik inuttassarsiuussarput pinerliisimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaammik piumasaqaateqarfiuvoq. Inatsit naapertorlugu kommune pinerliisimannginnermut uppernarsaammik aatsaat pippat atorfinitsitsineq aallartinneqarsinnaavoq. Taamaattumik malugeqqussavarput kommunip Politiinit pinerliisimannginnermut uppernarsaat aatsaat tiguppagu atorfiniffiusussaq isumaqatigiissutigineqarsinnaammat.

Inissaq:

Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: ini@ini.gl.

Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu A-skat sulitilluni ajunngittorsianut akileraartoqartassaaq inatsit atuuttoq naapertorlugu. 

IMALUUNNIIT Qaqugukkut atorfik aqqutigalugu inissamik tunisinnissaq apeqqutaalluni atorfimmi aallartinnissaq aaqqinneqarsinnaavoq. Malittarisassat atuuttut malillugit atorfininnermi angalanermut akiliussisoqassaaq aamma pequtit assartorneqarnerat akilerneqassaaq.

Atorfeqarnerup uninnerani, atorfik aqqutigalugu inissiaq qimanneqassaaq.

Qinnuteqaat

Qinnuteqaammi kommunimi aningaasaqarnermik aqutsinermik misilittakkatit nassuiaassavatit, aammalu aningaasaqarnikkut nalunaarusiornermik missingersuutinullu akisussaasut aningaasaqarnikkut piginnaasaannik ineriartortitsinermik siusinnerusukkut qanoq suliaqarsimaninnik tigussaasunik assersuuteqartitsillutit.

Sulisitsisunit siusinnerusunit pitsaasunik innersuussisoqarsinnaaneq pingaartipparput, taakku fagligt piginnaasatit, suleqatigiinnermik piginnaasatit aammalu angusatit uppernarsarneqarsinnaasut uppernarsarsinnaassavaat. Innersuussutit illit isumaqatigiissuteqarfigereerneratigut pissarsiarineqassapput.

Qinnuteqaatit ingerlaavartumik suliarineqassapput. Taamaattumik soqutiginnittut qinnuteqaatitik piaarnerpaamik nassiuteqquneqarput. Atorfinititsineq qinnuteqarfissatut killiliussap qaangiunnerata kingorna pissaaq.

Qinnuteqaat CV-ilu Kommune Qeqertalimmi elektroniskiusumik atorfinitsitsinermut systemi aqqutigalugu nassiunneqassapput.

Qinnuteqaatinik mail-ikkut allakkatigullu tigusineq ajorpugut.

Qinnuteqaatit nassiuguk, CV ilinniarsimanermut pikkorissarsimanermut uppernarsaatit, kiisalu oqaaseqaatit assigisaallu. 

”Atorfik una qinnuteqarfigiuk” toorlugu ikkunneqassapput.