Ataatsimiititaliani allatsitut Kommune Qeqertalimmi politikikkut allaffissorneq sullissisutut akisussaaffigissavat. 

Atorfik INUA-mi inissisimavoq, qaninnertut pisortat tassaassaaq allattoqarfimmi pisortaq.

Suleqatitit qaninnerit tassaassapput allattoqarfimmi pisortaq, suliassaqarfinni ataatsimiititaliani suliamut attuumassuteqartut kiisalu suliffeqarfiup avataanit suliassaqarfimmut soqutigisaqartut allat. Taakku saniatigut allattoqarfimmi sulisut.

Allaffissornikkut akisussaanerup saniatigut, kommunalbestyrelsimit ataatsimiititaliap siulittaasui pingaarnertut attaveqarfigisassavat. Ullumikkut ataatsimiititaliat ataavartut tassaapput; Timi Tarni ataatsimiititaliaq, Inoqarfik ataatsimiititaliaq aamma Inuit ataatsimiititaliaq. 

Makku suliarissavatit aamma ulluinnatit imannak imaqassapput: 

-Ataatsimiititaliat tamarmik immikkut tallimanik ilaasortaqartut aamma tallimanik sinniisoqartut kiffartuutissavatit 

-Suliassaqarfinni atorfillit sulianik saqqummiussassanik nassittassavaatit 

-Suliassaqarfimmi ineriartorneq aamma allannguutit pillugit allattoqarfimmi pisortap ilisimatinneqartarnissaanut akisussaaneq

-Inatsisit tunngavissaatitaasullu atuuttut suliamik saqqummiussissutit eqquutsinneraat eqqarsaatigalugu nalinginnaasumik nakkutilliineq

-Allagaatit pisariaqartut tamakkerlutigit qarasaasiamut toqqorneqarnissaannik aamma innuttaasup suliassartaanut attuumassuteqartinnissaanik kiisalu suliamik saqqummiussissutit kakkiunneqarnissaanik qulakkeerineq

-Suleriaatsinik nalimmassaaneq aamma nutarsaaneq

-Aalajangernerit, pilersaarutit aamma suliniutit pillugit suliassaqarfimmi qaffasissusissaanik pilersitsinermik qulakkeerinninneq, Inatsisit imaluunniit ingerlatsinermi ineriartortitsinermi pilersaarutit suliassaqarfimmi attuumassutilinnut, aqutsisunut kiisalu immikkoortortaqarfinnut allanut qitiusoqarfinnut imaluunniit suleqatinut avataaneersunut ataqatigiissaarinissamik qulakkeerinninneq

-Politikikkut suliallit anguniagaasa qulakkeerneqarnerinik akisussaaqataaneq

-Ataatsimiititaliallu paasisassarsiorlutik angalanissaannut piareersaaneq angalaqataanerlu

-Kiisalu allattoqarfimmi suliassat allat takkuttarumaartut

Ilinniakkavit ima ittuunissaa naatsorsuutigaarput:

-Naleqquttumik ilinniarsimassasutit 

-Pisortat ingerlatsineranni tunngaviusumik malittarisassanik aamma kommunit aqunneqarneranut inatsimmut attuumassuteqartunik ilisimasaqartutit 

-Suliffeqarfimmi politikikkut aqunnertumi misilittagaqariissasutit  

Inuttut ima ittuunissat aamma naatsorsuutigaarput: 

-Suleqatigiinnissamut aamma attaveqaqatigiinnermut pitsaasumik piginnaasaqartutit

-Tamakkiisumik isiginnissinnaalluartutit aamma ulluinnarnik ulapaarfiusunik qiimallutit isumaginnissinnaasutit

-Politikikkut pissutsinik malinnaasuusutit

Pinerliisimannginnermut uppernarsaat:

Atorfik inuttassarsiuunneqartoq pinerliisimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaammik piumasaqaateqarfiuvoq. Inatsit naapertorlugu kommune pinerliisimannginnermut uppernarsaammik aatsaat pippat atorfinitsitsineq aallartinneqarsinnaavoq. Taamaattumik malugeqqussavarput kommunip Politiinit pinerliisimannginnermut uppernarsaat aatsaat tiguppagu atorfiniffiusussaq isumaqatigiissutigineqarsinnaammat.

Akissarsiat atorfininnermilu atugassarititaasut:

Akissarsiat atorfeqarnermilu atugassarititaasut, atorfininnermi soraarnermilu angalaneq aamma pisattat nuunnerinut tunngasut, atorfininnerup nalaani Kalaallit Nunaanni Namminersorlutik Oqartussat kattuffiullu isumaqatigiinniaasinnaatitaasup akornanni isumaqatigiissutit atuuttut naapertorlugit aalajangersarneqassapput.

Inissaq:

Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: ini@ini.gl

Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu A-skat sulitilluni ajunngittorsianut akileraartoqartassaaq inatsit atuuttoq naapertorlugu.

Atorfeqarnerup uninnerani, atorfik aqqutigalugu inissiaq qimanneqassaaq.

Atorfik pillugu paasissutissat annertunerusut allattoqarfimmi pisortaagallartumut Benedikte Mølgaard mailikkut saaffiginninnikkut pissarsiarineqarsinnaapput, email: benm@qeqertalik.gl imaluunniit oqarasuaammut uunga sianernerluni 70 19 00. 

Qinnuteqarfissap ullua kingulleq: 27. Maj 2026

Piffissap ingerlanerani qinnuteqartunik oqaloqatiginninnerit ingerlanneqarsinnaapput.

Qinnuteqarneq:

Qinnuteqaatinik mailikkut allakkatigullu tigusineq ajorpugut.

Qinnuteqaatit nassiuguk, CV ilinniarsimanermut pikkorissarsimanermut uppernarsaatit, kiisalu oqaaseqaatit assigisaallu. 

”Atorfik una qinnuteqarfigiuk” toorlugu ikkunneqassapput.

Qinnuteqaatit nassiunnerini ajornartorsiuteqaruit hr@qeqertalik.gl attavigiuk.

Qinnuteqaatissat tigunissaanut qilanaarpugut. 

Qinnuteqarnissamut killissarititaasoq: maajip 27.-at, 2026