Arnajaraq Hammeken 2026-mi decembarip aallaqqaataani aqutsisoqarfimmi pisortatut sulilissaaq. Kalaallit Nunaanni meeqqanut, inuusuttunut ilaqutariinnullu isumaginninnikkut suliniuteqarnermi qitiusumik inissisimaffeqalissaaq.
Arnajaraq Hammeken decembarip aallaqqaataani atorfinippat Isumaginninnermut Aqutsisoqarfik nutaamik pisortartaassaaq. Meeqqanut, Inuusuttunut, Inatsisinillu Atuutsitsinermut Naligiissitaanermullu Naalakkersuisoqarfik taama nalunaaruteqarpoq.
Aqutsisoqarfimmi pisortanngortussaq sulinermini siornatigut aqutsisutut isumaginninnermilu assigiinngitsunik atorfeqarsimavoq. Ilaatigut isumaginninnikkut suliniutinik ineriartortitsinermik, siunnersuisarnermik, sulisoqarfinnik ineriartortitsinermik suliassaqarfiillu assigiinngitsut akornanni suleqatigiinnermik misilittagaqarpoq.
Meeqqanut, Inuusuttunut, Inatsisinillu Atuutsitsinermut Naligiissitaanermullu Naalakkersuisup Mariane Paviasen Jensenip Hammekenip suliatigut piginnaasai aqutsinermillu misilittagai erseqqissarpai.
– Arnajaraq Hammekenip Isumaginninnermut Aqutsisoqarfimmi pisortanngornissaa nuannaarutigaara. Suliatigut piginnaasaqarluarpoq aqutsinermillu annertuumik misilittagaqarluni. Tamanna Isumaginninnermut Aqutsisoqarfiup Kalaallit Nunaat tamakkerlugu meeqqanut, inuusuttunut ilaqutariinnullu sulinerata nangittup nukittorsarnissaanut iluaqutaassaaq, nalunaarummi oqarpoq.
Naalakkersuisoqarfimmi pisortap Helena Lynge Møllerip aamma suleqatiginissaa qilanaaraa. Taassuma pisortanngortussap isumaginnittoqarfimmik ilisimasaqarluarnera erseqqissarpaa, kommuninillu suleqateqarneq sulinerup ingerlaqqinnissaani pingaaruteqartutut tikkuarlugu.
Isumaginninnermut Aqutsisoqarfiup kommunit, suliatigut sullissisut innuttaasullu siunnersuisarnikkut, ineriartortitsinikkut isumaginninnikkullu suliniuteqarnikkut tapersersorpai.
