Kommune Kujallermi imigassamik tuniniaaqqilernissamut periarfissaq pillugu innuttaasut, meeqqat inuussutissarsiortullu tusarniaaffigineqassapput. Kommunalbestyrelsip suliaq novembarip 18-iani oqaluuserissavaa.
Kommune Kujallermi Aningaasaqarnermut Inuussutissarsiornermullu Ataatsimiititaliap imigassamik tuniniaaqqilernissamut periarfissaq pillugu tusarniaasoqassasoq aalajangerpaa. Aalajangiineq ataatsimiititaliap marlunngornermi oktobarip 27-iani ataatsimiinnerani pivoq.
Tusarniaaneq oktobarip 28-ianit novembarip 11-at ilanngullugu ingerlanneqassaaq. Tamatuma kingorna kommunalbestyrelsip novembarip 18-iani aalajangiiffigissavaa imigassamik tuniniaaqqilernissaq qaqugukkut sulissutigineqarsinnaassanersoq, suliniutillu suut aallartinneqassanersut.
Tusarniaanermut atatillugu kommunip illoqarfiini tamani innuttaasunik ataatsimiisitsisoqassaaq. Aamma Kommune Kujalliup Nakuusaaqqatai isummaminnik saqqummiussinissamut periarfissinneqassapput.
Tusarniaaffigineqartussanut ilaapput pisortani oqartussat, Allorfik, nunaqarfinni aqutsisut kiisalu pisiniarfiit, unnuisarfiit neriniartarfiillu imigassamik tuniniaanissamut akuersissuteqartut. Innuttaasut, meeqqat susassaqartullu allat aamma peqataatinneqassapput.
Borgmesteri Malene Vahl Rasmussenip oqaatigaa tusarniaaneq kommunalbestyrelsip aalajangiinissaanut tunngavissamik siammasissumik patajaatsumillu qulakkeerinneqataassasoq.
Tusarniaanermi akissutit aamma tunngavigineqassapput nalunaarusiami »Flerårig, forskningsbaseret alkoholpolitik og anbefalinger«-imi kaammattuutit 18-it sorliit Kommune Kujallermi suliniutinngortinneqassanersut nalilersorneqalerpat.
Innuttaasunik ataatsimiisitsinissat ullui aalajangerneqariarpata kommunip nittartagaani tamanut saqqummiunneqassapput.
Paasissutissarsiffik: Kommune Kujalleq.
