Kommune Kujallermi atuarfinni tamani atuartut imigassamik tuniniaanerup unitsinneqarallarnissaa qanoq misiginerlugu allallutik titartaallutilluunniit maanna oqaluttuarisinnaalerpaat. Meeqqat saqqummiussaat kommunalbestyrelsimut ingerlateqqinneqassapput.
Kommune Kujalliup imigassamik tuniniaanerup inerteqqutaagallarnissaa pillugu meeqqat isumaat tusarusuppai. Taamaattumik kommunip illoqarfiini nunaqarfiinilu atuarfinni tamani katersuivinnik karsinik inissiisoqarsimavoq.
Meeqqat eqqarsaatitik, isummatik inerteqquteqarnerlu pillugu misigisatik titartaganngorlugit allaganngorlugilluunniit karsinut tunniussinnaavaat.
Borgmesteri Malene Vahl Rasmussen oqarpoq, meeqqat illersorniarlugit aalajangiineq qanoq misiginerlugu oqaluttuarinissaminnut periarfissaqartinneqassasut.
– Meeqqat illersorniarlugit imigassamik tuniniaaneq inerteqqutigigallarparput. Taamaattumik aamma tusarusupparput tamanna qanoq sunniuteqarfigigaat qanorlu misiginerlugu, Kommune Kujalleq naapertorlugu oqarpoq.
Meeqqat saqqummiussaat katersorneqareerpata kommunalbestyrelsimut ingerlateqqinneqassapput. Taamaalillutik meeqqat namminneq isiginnittaasiat politikerit oqallinnerisa ingerlaqqinneranni ilanngunneqassapput.
Tusarfik: Kommune Kujalleq
