Naalakkersuisut Kitaani sinerissap qanittuani saarullittassiissutit 26.515 tonsinut qaffappaat. Nuussinerup aalisartut ukiup sinnerani aalisarsinnaanissaat periarfississavaa.
Kitaani sinerissap qanittuani saarullittassiissutit nungunneqangajalerput. Taamaattumik Naalakkersuisut oktobarip 23-anni aalajangerput tunngaviusumik killigititamit avasissutsip 3 sømilip avataani pisassiissutinit 3.500 tonsit sinerissap qanittuani aalisarnermut nuunneqassasut.
Sinerissap qanittuani pisassiissutit aallaqqaammut 23.015 tonsiupput. Oktobarilli 20-anni 21.306 tonsit aalisarneqareersimapput, tassa pisassiissutit 92,6 procentii. Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik naapertorlugu pisassiissutit sapaatit-akunnerisa tulliuttut ingerlaneranni nungunneqarnissaat ilimagineqarpoq.
Nuussinerup kingunerisaanik pisassiissutit 26.515 tonsinut qaffapput.
Pisassiissutit atorneqanngitsut sinerissamut qaninnerusumut nuunneqarput
Naalakkersuisut 2026-mi sinerissap qanittuani aalisariutinut tunngaviusumik killigititamit avasissutsip 3 sømilip avataani saarullittassiissutit katillugit 5.000 tonsit immikkoortissimavaat. Aalisarnissamut akuersissutinik tunniussisoqarsimagaluartoq oktobarip 20-anni pisassiissutinit taakkunannga suli pisaqartoqarsimanngilaq.
Maanna avannaani aqutsiveqarfimmit 1.000 tonsit kujataanilu aqutsiveqarfimmit 2.500 tonsit nuunneqarput. Taamaalilluni 3 sømilip avataani pisassiissutit sinneruttut avannaani 500 tonsiulerput kujataanilu 1.000 tonsiulerlutik.
3 sømilip avataani pisassiissutit sinerissap qanittuani aalisariutinit 2024-mi sinerissap qanittuani aalisarnissamut akuersissuteqarsimasunit aalisarneqarsinnaapput.
Naalakkersuisoqarfik naapertorlugu allannguinerup siunertaraa aalisartut tunitsiviillu iluaqutigisaannik sinerissap qanittuani saarullinniarnerup ukiup sinnerani ingerlaannarsinnaanissaa qulakkiissallugu. Nuussinerup aamma pisassiissutit aalajangersarneqarsimasut inuiaqatigiinnut iluaqutaasumik atorneqarnissaat qulakkeeqataaffigissavaa.
Paasissutissarsiffik: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik.
