Esther Brandt Arens Eva Davidsenilu KAK-p ulluinnarni sulineranik nukittorsaaqataassapput. Atorfinitsitsinerit peqatigiiffinnut sullissinermut kiisalu isikkamik arsaannerup futsalillu ineriartortinneqarnerannut piffissaqarnerulersitsissapput.
Kalaallit Arsaattartut Kattuffiata (KAK) allattoqarfia sulisunik marlunnik ilaneqarpoq. Esther Brandt Arens maanna sulilerpoq, Eva Davidsenilu 2026-mi novembarip aallaqqaataani sulilissalluni.
KAK ilisimatitsivoq suliassat amerliartornerat kattuffimmullu piumasaqaatit annertusiartornerat atorfinitsitsinernut pissutaasut.
– KAK annertuumik ineriartorpoq, tamatumalu malitsigisaanik suliassat amerliartorput piumasaqaatillu annertusiartorlutik. Taamaattumik allattoqarfipput inunnik sulinermik aaqqissuussisinnaasunik akisussaaffimmillu tigusisinnaasunik nukittorsartariaqarsimavarput. Estherip Evallu piginnaasaat imminnut tapertariilluartuupput, KAK-p siulittaasua Kenneth Kleist oqarpoq.
Esther Brandt Arens kingullermik ilinniartitaanermut pisortatut atorfeqarsimavoq. Allaffissornermik, sulisunik sullissinermik, aqutsinermik, ilinniartitaanermik kattuffinnillu ineriartortitsinermik ukiorpassuarni misilittagaqarpoq. Ilaatigut sulisunik aqutsineq, pilersaarusiorneq aningaasaqarnerlu suliarisarsimavai.
Eva Davidsen ilaatigut Kalaallit Nunaanni Eqqartuussivimmi SIK-milu sulisimavoq. Allaffissornermik, aningaasaqarnermik, missingersuutinik malinnaanermik, ilaasortanik sullissinermik sulisunillu sullissinermik misilittagaqarpoq. Aamma nammineq kajumissutsiminik suliaqarnermigut isikkamik arsaannermik ilisimasaqarluarpoq.
Sulisut nutaat marluk ulluinnarni suliassanik isumaginnittassapput kattuffiullu ineriartortinneqarneranut peqataassallutik.
KAK naapertorlugu atorfinitsitsinerit allattoqarfimmi suliassat agguataarneqarnerannik ersarinnerulersitsissapput. Tamanna peqatigiiffinnut, meeqqanut inuusuttunullu, nunanut allanut unammisartunut ilinniartitaanermullu kiisalu Kalaallit Nunaanni isikkamik arsaannerup futsalillu ineriartortinneqarnerannut piffissaqarnerulersitsissaaq.
