Portørit annaassiniartartut arfineq-pingasut ilinniakkaminnik naammassinnillutik sulilernissaminnut piareerput. Ilinniarnerminni ilaatigut VR-teknologi atorlugu sungiusarsimapput.
Portørit annaassiniartartut arfineq-pingasut ilinniarnerminni tunniusimaneq, akisussaassuseqarneq ilikkagaqarusussuseqarnerlu takutissimavaat.
Piviusuusaartitsineq, aamma VR-imik taaneqartartoq, atorlugu sungiusarneq ilinniartitsinerup ilaanut pingaarutilimmut ilaavoq. Teknologi taanna ilinniartunut periarfissiivoq pissutsini piviusunut assingusuni isumannaallisaanikkullu piumasaqaateqarfiusuni nakkutigineqartumik avatangiiseqarlutik sungiusarnissamut.
Piviusuusaartitsineq atorlugu pisunik ilungersunartunik isumaginninnissaq sungiusarsinnaasimavaat napparsimasut navianartorsiortinngikkaluarlugit. Tamanna ilinniartut piginnaasaannik nukittorsaanissamik portøritullu annaassiniartartutut sulinerminni unammilligassanut piareersaanissamik siunertaqarpoq.
