Kalaallit Nunaanniit nunanut allanut ruteflynik ilaasartut amerliartorput. Ukiup qaammataani siullerni arfineq-pingasuni ilaasartut amerlassusaat siorna piffissamut tassunga naleqqiullugu 5,7 procentimik qaffariarsimavoq.
Nunatta avataanut ruteflynik ilaasartut amerlassusaat suli qaffakkiartorpoq. Januaarimiit augustimut ilaasut nunatsinnit aallartut 86.842-t nalunaarsorneqarput, 2025-mi piffissami tassani 82.176-usut.
Kalaallit Nunaanni Naatsorsueqqissaartarfiup septembarip 29-anni saqqummiussaani tamanna takuneqarsinnaavoq. Tamanna ilaasut 4.666-inik amerleriarsimanerannik isumaqarpoq.
Amerliartornerat arriillisimavoq
Ilaasut amerlassusaat suli siornamut naleqqiullugu qaffasinnerugaluartoq, aasap ingerlanerani amerliartornerat arriillisimavoq.
Ukiup affaani siullermi amerleriartorneq 12,3 procentiuvoq. Ukiulli qaammataasa siulliit arfineq-pingasut kingorna amerleriartorneq 5,7 procentiuvoq.
Juulimi nunatta avataanut ruteflynik ilaasut amerlassusaat siorna qaammammut tassunga naleqqiullugu 1.285-inik ikileriarsimavoq. Augustimili amerleqqipput: Qaammammi tassani ilaasut 18.726-t nunanut allanut aallarput, tassa 2025-mi augustimut naleqqiullugu 549-nik amerlanerullutik.
Paasissutissarsiffik: Kalaallit Nunaanni Naatsorsueqqissaartarfik, »Flyrejsende til udlandet i august«, 29. september 2026.
