Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen ”Juulut” Rosbach Berlinimut Parisimullu angalavoq, Tasersuup aamma Tarsartuup Tasersuata erngup nukinganik nukissiornissamut periarfissaannut aningaasaliisartut soqutiginnilersinniarlugit.
Avatangiisinut, Pinngortitamut, Nukissiutinut Ilisimatusarnermullu Naalakkersuisoqarfik naapertorlugu, erngup nukinganik nukissiornissamut periarfissat taakku marluk qanittukkut unammisitsinikkut neqeroorutigineqassapput.
– Erngup nukinganik nukissiornissamut periarfissarujussuit atorluarneqarnissaat sulissutigivara, taamaaliornikkut sumiiffinni inuussutissarsiornikkut periarfissanik nutaanik suliffinnillu pilersitsisoqarsinnaammat, Jørgen ”Juulut” Rosbach oqarpoq.
Parisimut tikeraarnermi nukissiuutitigut imminut pilersornerup annertusarneqarnissaanut misilittakkanik avitseqatigiinneq aamma sammineqarpoq. Frankrigip Kalaallit Nunaat assigalugu nammineq nukissiornini annertusarniarpaa, taamaalilluni nunarsuarmi niuerfinni nikerarnerit nunallu tamalaat akornanni pissanganartorsiortoqarnerat nukissiuutinik pilersuinermut sunniuteqannginnerussammata.
Oqaloqatigiinnerni ilaatigut nukissiuutinik ataavartunik annertusaaneq, nukissiuutinik pilersuinermi aaqqissuussanik pitsanngorsaaneq kiisalu erngup nukinganik nukissiorfissuit aserfallatsaaliorneqarnerat sammineqarput. Rosbachip aamma erngup nukinganik nukissiorfik Roselend-La Bâthie takornariarpaa.
Naalakkersuisoq naapertorlugu, Frankrigip erngup nukinganik nukissiornermik ukiorpassuarni misilittagai Kalaallit Nunaata ilinniarfigisinnaavai.
– Frankrigip erngup nukinganik nukissiorfissuit pillugit misilittagaqarfiata sivisussusia Kalaallit Nunaanni misilittagaqarfigisatsinnit marloriaat sinnerlugu sivisuneruvoq. Taamaattumik ilinniarfigisinnaasavut amerlaqaat, Jørgen ”Juulut” Rosbach oqarpoq.
Aamma Frankrigip nukissiuutitigut imminut pilersornissamut anguniagai teknikkikkullu aaqqiissutissanik ilisimatusarnera Kalaallit Nunaannut iluaqutaasinnaasutut erseqqissaatigai.
