026-mut ukiup affaanut nalunaarusiami takuneqarsinnaavoq suli aningaasatigut tunngavissaqarluartugut, ilutigalugu inuiaqatigiinni digitalikkut attaveqaasersuutit ineriartorneranni aningaasaliissutit pitsannguuteqangaatsiartut. Ukiup affaani siullermi aningaasaliissutit ukioq kingullermut sanilliullugit marloriaataat sinnerlugu annertuseriarsimapput.
2026-mut ukiup affaanut nalunaarusiami takuneqarsinnaavoq kaaviiartitat ilanngaaseriikkat 399,7 mio. kr.-usut aamma akileraarutit akilinnginnerini angusat 67,1 mio. kr.-usut. Ilutigalugu ukiumi qaammatini arfinilinni siullerni sanaartugassanut 104,8 mio. kr.-nik aningaasaliissuteqarpugut, ukioq kingulleq piffissami tassani 48,7 mio. kr.-ullutik. Taamaalilluni aningaasaliinerit qaffasissusii ukiumi ataatsimi marloriaammit annerupput.
“Aningaasaqarnikkut patajaatsumik inissisimavugut tamatumalu digitalikkut attaveqaasersuutinik ineriartortitsinissamut annertuumik aningaasaliisinnaatippaatigut. Teknologi kisimi pineqaannanngilaq kisianni aamma innuttaasunut, suliffeqarfinnut aamma inuiaqatigiinnut ataatsimut isigalugit attaveqaatit pitsaasut pilersinneqarnissaat aammalu periarfissat amerlanerusut pineqarput. Nuna tamakkerlugu attaveqaatit pitsanngorsarnissaat pillugu periusissiatsinnut naapertuulluinnarpoq aamma siunissami inuiaqatigiinnut digitalikkut tunngavimmik pilersitsilluni,” taama oqarpoq pisortaaneq Jonas Hasselriis.
Aningaasatigut patajaassuseq ineriartornissamut inissaqartitsivoq
Ukioq kingulleq piffissami tassani angusat appasikkaluartut suli aningaasatigut peqqinnartumik ingerlavugut, ukiup affaata naanerani aningaasaqarnikkut kisitsisit pingaarutillit naammaginarluartuullutik.
“Ukiuni arlariiaani aningaasaqarnermik patajaatsumik ingerlatsivugut, tamannalu nukittuffik maanna periusissiugaasumik anguniakkatsinnik piviusunngortitsiniarluta atorparput. Ilutigalugu akitigut nalimmassaanerit ukioq manna ingerlatagut siunissami kaaviiaartitanut sunniuteqassasut naatsorsuutigaarput. Ineriartorneq tamanna malillugu pilersaarusiorpugut aningaasatigullu nammassinnaallugu. Taamaattumik attaveqaasersuutitigut annertuumik aningaasaliisinnaavugut aamma periusissiornermi suliniutit pingaarnerit ingerlassinnaallugit, ” taama oqarpoq aningaasaqarnermi pisortaq Line Mika Skov.
Niuerfissat nutaat aamma immikkut tuniniaanerup ukkatarinera
Akinik nalimmassaanerit periusissiamut ilanngullugu ingerlatagut ima paasineqassapput aningaasaqarnikkut ineriartornitta nalinga atuisutsinnut annertuumik iluaqutaassasoq. Tamanna ilutigalugu niuerfigisagut immikkullu tuniniaaneq ineriartortinniarlugit siunnerfilimmik sulivugut siunissami ungasissumi suliffeqarfiup ineriartortinnissaanut tapertaasussamik. Ineriartornermi aamma nioqqutigut amerlasuut suli ujartorneqartut takuneqarsinnaavoq tamannalu pitsaasuulluni. Internetikkut sullitat amerleriarput oqarasuaatinullu angallattakkanut attavinnut tunngatillugu kaaviiaartitat annertusillutik.
Akitigut appaanerit 2026-mi maajimi saqqummiunneqartut ukiup affaani angusanut sunniuteqanngillat piffissami kingusissukkut aatsaat atuutilernerat peqqutaalluni.
2026-imi ukiup affaani siullermi ineriartorneq tunngavigalugu 130-140 mio. kr.-nik akileraarutit sioqqullugit angusaqarnissaq naatsorsuutigaarput.
