Nuna Allanngutsaaliugaq nutaaq ataasinngornermi atoqqaarfissiorneqassaaq

Ataasinngornermi septembarip 14-iani Kalaallit Nunatta kitaani Nuna Allanngutsaaliugaq nutaaq atoqqaarfissiorneqassaaq.

Naalakkersuisut, Kommune Qeqertalik aamma Qeqqata Kommunia pisortatigoortumik ammarneqarnissaa Kangerlussuup eqqaani Sermersuup Isunnguata eqqaani aaqqissuussinikkut nalliuttorsiutigissavaat.

“Nuna Allanngutsaaliugaq nutaaq ammarneqarnissaa qilanaaraara. Nunarsuarmi pinngortitarput assigineqannginnerpaat ilaannik peqarpugut, pinngortitarlu paarissallugu akisussaaffeqarpugut. Nuna Allanngutsaaliukkap pinngortitaa, uumasullu illersorneqarnissaannut pingaarutilimmik alloriarpugut, tamatuma peqatigisaanut innuttaasut atuinerat ingerlaannassalluni. Ullumikkut uagut kisitta pineqanngilagut, aamma kinguaariit tullinnguuttussat pingaarutilimmik pineqarput.” Avatangiisinut, Pinngortitamut, Nukissiuuteqarnermut Ilisimatusarnermullu Naalakkersuisoq Jørgen Rosbach oqarpoq.

Ulloq tassani Nuna Allanngutsaaliugaq qanoq atserneqarsimanersoq tamanut saqqummiunneqassaaq. Nuna Allanngutsaaliugaq Kalaallit Nunatsinni nammineq pilersinneqartoq siullersaraat. Kommune Qeqertaliup, Qeqqata Kommuniata Naalakkersuisullu suleqatigiinnerisigut tunngaveqartoq.

Innuttaasut tamarmik sumiiffimmi ingerlaarsinnaajuassapput, aammalu maannamut pisarnermisut piniariarsinnaallutillu aalisariarsinnaapput. 
Sumiiffinni ataasiakkaani, killilersorluakkanilu taamaallaat ilaani uumasut sunnertiasut mianerineqarnissaat pillugu aalajangersimasumik malittarisassaqarpoq.


Kalaallit Nunaata kitaani Nuna Allanngutsaaliugaq, naatsumik oqaluttuaralugu

Annertussuseq: 22.249,80 km².
Inissisimaffik: Kalaallit Nunaata kitaani, Kangerlussuup aamma Qeqertarsuup Tunuata akornanni.
Ulloq atuutilerfik: 1. juuni 2026.
Pisortatigoortumik atoqqaarfissiorneq: 14. septembari 2026.
Oqaluttuassartaa: Ukiut 50-it sinnerlugit ingerlanerani Kalaallit Nunaanni Nuna Allanngutsaaliugaq siulleq aammalu nunami nammineerluni ineriartortitaq siulleq.
Suliniuteqartut: Kommune Qeqertalik, Qeqqata Kommunia aamma Wild Nature Foundation.
Aningaasalersuisoq: EU Grøn Vækst.
Siunertat pingaarnerit pingasut: Pinngortitamik illersuineq, najugaqartunut aamma piujuartitsiviusumik takornariaqarnermut atorneqarnerata ingerlaannarnissaa.