Nunanut allanut, Inuussutissarsiornermut, Aatsitassanullu Naalakkersuisup, Múte B. Egedep, 2026-mi septembarip 4-ni Paris-imi tikeraarnermini, franskit Nunanut Allanut Niuernermut aningaasaqarnikkullu Pilerinartuulersitsinermut ministeriat, Nicolas Forissier, kiisalu Suliffeqarfinnut, Niuernermut, Sanaartornermut, Takornariaqarnermut Pisisinnaassusermullu ministeriat, Serge Papin, peqatigalugit suleqatigiinnissamik isumaqatigiissutit marluk atsiorpaat.
Nunat taakku marluk akornanni suleqatigiilluni oqaloqatigiittarnissamik pilersitsinissamut kiisalu ilisimatusarnerup aamma kulturip iluini suleqatigiinnissamut aamma takornarialerinerup iluani suleqatigiinnissamut isumaqatigiissutit tunngassuteqarput.
Taamaalilluni atortussiassanut tunngatillugu siornatigut suleqatigiinnissamik isumaqatigiissutaasimasoq ilanngullugu, franskit naalakkersuisuinik suleqateqarneq aamma illugiimmik attaveqarneq nukittorsarumallugu Naalakkersuisut siunnerfilimmik suliaqarsimapput.
Naalakkersuisoq Múte B. Egede Franskit Europamut nunanullu allanut ministeriat, Jean-Noël Barrot tikeraarnermini aamma naapippaa.
Naalakkersuisoq Múte B. Egede imak oqaaseqarpoq:
”Nunarsuarmi aaqqissuussaanerup ilisimasimasatta allanngornerani, Kalaallit Nunaatalu qanimut iligisanik nukittunerusumik suleqateqalerniarnerani Frankrig Kalaallit Nunaannut nukittuumik suleqataallunilu iligisaavoq.
Kalaallit Nunaata immikkuullarilluinnartumik, ilungersunartumillu inissisimanerani – pisumi suli nalaateqqasatsinni – franskit naalakkersuisuinit pingaartumik Præsident Macronimit aamma Europamut, Nunanullu allanut ministerip Barrotip tapersersuinerinut Naalakkersuisut qujamasupput.
Suleqatigiilluni oqaloqatigiittarnissamik, arlalitsigullu suleqatigiinnissamik pilersitsinikkut nunat marluullutik takutippaat, nunat tamalaat suleqatigiinnissaannut aamma atassuteqarluarnissamut ataqqinnilluni oqaloqatigiittarneq aamma illugiimmik paaseqatigiinneq suli aqqutissaasoq. Franskit naalakkersuisuinik kinguneqartussamik suleqateqarnissaq qilanaaraara.”
Isumaqatigiissutit www.naalakkersuisut.gl-imi takuneqarsinnaapput.
