EU suliassamut nutaamut, Kalaallit Nunaanni niuernermik tunngaveqarluni erngup nukinganik anorillu nukinganik suliaqarnermi paasissutissanut tunngaviusunik nukittortitsisussamut 20 millioner koruunit missaannik tapiissuteqarpoq.
Suliniut Asiaq – Greenland Survey-p suliarissavaa, tassanilu imermut tunngassutilinnik misissuinerit, anorip nukinganik misissuinerit nutaat, kiisalu pisortat paasissutissaasiviannik, paasissutissanik taamaattunik tamanut takunnitsitsiffiusinnaasumik ineriartortitsineq sulia-rineqassapput.
Tapiissutit Naalakkersuisut aamma EU-mi Ataatsimiititaliarsuup akornanni Grøn Vækst pillugu isumaqatigiissutaannut ilatigitillugu tunniunneqarput. Tapiissutit siunissami nukissiutinut ataa-vartunut avataaniit niunermik tunngaveqarluni aningaasaliisinnaasunik pileritsatsitsinissamut tunngavissanik nukittortitseqataassapput. Tamatuma peqatigisaanik paasissutissat aamma Kalaallit Nunaanni ilisimatusarnermut, silap pissusianut naleqqussaanermut siunissamullu ungasissumut nukissiornermut pilersaarusiornermut tapertaassapput.
Suliniut ukiuni tallimani ingerlanneqassaaq, aammalu nukissiutinut ataavartunut aningaasalii-sarnermut tunngavissanik nukittortitseqataassaaq, kiisalu ilisimatusarnernut silallu pissusiinut naleqqussaanernut tapertaassalluni.
Avatangiisinut, Pinngortitamut, Nukissiuteqarnermut Ilisimatusarnermullu Naalakkersuisup EU-mit tapiissutit nuannaarutigai: “Nukissiutinut ataavartunut periarfissaqartorujussuuvugut, aammalu aningaasaliisussanik pileritsatsitsiniarutta ineriartortitsinermillu nutaamik pilersitsiniarutta paasissutissat patajaatsut pissarsiarineqarsinnaasullu pisariaqartippagut. EU-miit tapiissuteqar-toqarnerani erngup nukinga aamma anorip nukinga pillugu ilisimasagut nukittortinneqassapput, aammalu paasissutissat pingaarnerit arlallit tamanit takuneqarsinnaalernissaannut pingaaruti-limmik alloriarsinnaalerpugut. Tamanna siunissami aningaasaliisarnernut, ilisimatusarnernut mingutsitsinngitsunullu allannguinissatsinnut tunngavissanik nukittunerulersitsivoq.”
Aningaasat ilaatigut erngup nukinganik isumalluuteqarfinni pingasuusuni erngup pissusianik misissuinernut atorneqassapput, tassani uuttortaanerit siunissami niuernermik tunngaveqarluni aningaasaliisussanik pileritsatsitsinissamut tapertaqarnissamut pisariaqartinneqarmata.
Aamma aningaasat anorip nukissiornermut annertuumik atorneqarnissaanut misissuinernut nutaanut atorneqassapput. Asiaq ukiorpassuarni erngup pissusiinik uuttortaanermik, aamma silamik silallu pissusiinik uuttortaanermik misilittagaqarpoq, anorilli nukissiornermut annertuumik atorneqarnis-saanut misissuinerit Asiamut suliassaqarfiupput nutaajusut. Taamaattumik suliassaq Asiap tamatu-munnga piginnaaneqarfimminik ineriartortitsinissaanut periarfissiissaaq.
Naggataagullu aningaasat paasissutissaasivimmik, paasissutissat toqqakkat tamanit takuneqarsin-naalerfigisassaannik ineriartortitsinerup qulakkeerneqarnissaanut atorneqassapput. Siullermik paasissutissat, suliaq taanna aqqutigalugu katersorneqartut paasissutissaasivik aqqutigalugu takuneqarsinnaalersinneqassapput.
“EU suliassamut tapersiiniarluni aalajangersimammat nuannaartorujussuuvugut tulluusimaarlu-talu. Mingutsitsinngitsumik nukissiornissamut periarfissagut annertupput, kisiannili ukiorpassuit ingerlanerini paasissutissat patajaatsut katersorneqarsimasut avataaniit aningaasaliisussanik pileritsatsitsinissamut pingaaruteqarput. Tamatuma peqatigisaanik paasissutissat ilisimatusar-nermut silallu pissusianut naleqqussarnermut atorluarsinnaasorujussuuppt,Asiami pisortaaneq Mette Skarregaard oqarpoq.
Suliap immikkoortuani siullermi pilersaarusiornissaq aammalu uuttortaaffissanik piukkunnarner-paanik toqqartuinissaq aallunneqassapput. Tamatuma kingorna uuttoortaanissamut pilersaarutit, ornigulluni suliassat paasissutissaasivimmillu ineriartortitsinissaq suliarineqassapput.
Paasissutissatigut tunngavissanik siunissamut ungasissumut atugassanik patajaatsunillu, Kalaallit Nunaanni mingutsitsinngitsunut allannguinissamut siunissamilu nukissiornermut aningaasaliisar-nissamut tapertaasinnaasunik pilersitsinissaq siunertarineqarpoq.
Annertunerusumik paasisaqarusunnermi Avatangiisinut, Pinngortitamut, Nukissiuteqarnermut Ilisimatusarnermullu Naalakkersuisoqarfik e-mail: pan@nanoq.gl aqqutigalugu attaveqarfigineqassaaq.
