Kommunip asfaltsiliorfia sapaatip akunnerini marlunni iluarsartuunniarlugu misilerarneqareersoq paasinarsivoq asfaltiliorfik aaqqinneqarsinnaanngitsoq, nutaamillu taarsertariaqalersoq.
Pilersaarutaagaluarpoq ukioq manna Nanortalimmi asfaltiterinissaq, asfaltiliorfiulli atorsinnaajunnaarnerani tamanna pisinnaajunnaarallarmat Nanortalimmi aqqusernit putuinik sulineq aallartinneqarpoq.
-Naak asfaltiliorfimmik iluarsartuussineq iluatsinngitsooraluartoq, aqquserngit putuinik iluarsaassinerup aallartinneqarnissaa pingaaruteqarpoq. Taamaattumik iluarsaassinerit maannamiit ingerlateqqissavagut, Kommune Kujallermi sanaartornermut pisortaq Mads Kenneth Petersen oqarpoq.
Kommune Kujalleq asfaltiliorfimmik angallattakkamik pissarsiniarluni maanna sulissuteqaleruttorpoq. Pilersaarutit malillugit asfaltiliorfik taanna aappaagu Nanortalimmi atorneqarsinnaalissaaq.
Asfaltiliorfik angallattagaq kommunimi pisariaqartitsiffiusuni asfaltilersuisarnissamik pitsaanerusumik periarfissiissaaq.
