Kalaallit Nunaanni nunanut allanut naalakkersuisuusimasoq Vivian Motzfeldt marlunngormat unnukkut Copenhagen Goodwill Ambassadors-ip ukiunik 30-nngortorsiorluni Københavnip Rådhusiani nalliuttorsiorneranut atatillugu attaveqaqatigiit nersornaasiuttagaanik immikkut ittumik tunineqarpoq.
Copenhagen Goodwill Ambassadors-ip ukiut 30-nngorlugit nalliuttorsiornini marlunngormat unnukkut Københavnip Rådhusiani nalliuttorsiornermi malunnartippaa, tassanilu inuit suliffeqarfiillu arlallit suliniutigisimasatik pillugit nersornaaserneqarput. Attaveqaqatigiittarfik turisme.nu, aaqqissuussinermut malinnaasimasoq taamatut allappoq.
Nersornaasigaasunut Vivian Motzfeldt ilaavoq, taannalu piffissami Issittup annertuumik aallunneqarfiani Naalagaaffeqatigiinneq aammalu Danmarkip nunani tamalaani attaveqaatai sinnerlugit sulisimanerminut attaveqaqatigiit nersornaasiuttagaannik immikkut ittumik tunineqarpoq.
Innarligassaanngissutsini pillugu nersualaarneqarpoq
Goodwill-ambassadørinut siulittaasoq, siornatigut Københavnimi borgmesteriunerusimasoq Jens Kramer Mikkelsen nersornaammi tunniussinermini Motzfeldt-ip piffissami Kalaallit Nunaata nunani tamalaani soqutigineqangaatsiarfiani suliai erseqqissaatigai.
»Vivian Naalagaaffeqatigiinnitta nipinik nukittuunik atorfissaqartitsinerpaaffiani malunniutilinnik pilersitsisimavoq. Innarligassaanngissutsini Kalaallit Nunaata Danmarkillu killeqarfii qaangerujussuarlugit isumassarsiuititsiffiusoq atorlugu taamaaliorpoq,« Jens Kramer Mikkelsen nersornaammik tunniussinermini oqarpoq.
Vivian Motzfeldt-ip oqalugiarnermini ataatsimoorneq oqaloqatigiinnerlu pingaartillugit oqarpoq.
»Piffissat artornarnerpaat nipinik nipitunerpaanik pisariaqartitsiffiusanngillat, kisiannili inuit ataatsimoorsinnaasut, tusarnaarsinnaasut ataatsimullu aqqutissarsisinnaasut pisariaqartinneqartarput. Taamaaliornissatsinnut piffissat siuttuuffigisagut tamatigut toqqarsinnaaneq ajorpagut, kisiannili qanoq iliorluta naaperiaasinnaanerluta aalajangiisinnaavugut,« oqarpoq.
Copenhagen Goodwill Ambassadors-imut danskit inuussutissarsiorfiini pisortat, nunani 25-t sinnerlugit amerlassusilinni najugaqartut 40-t sinnerlugit ilaasortaapput. Aaqqissuussaanerup Københavnip Danmarkillu nunani tamalaani inissisimanerisa nukittorsarnissaat sulissutigaa, tassungalu H.K.H. Prins Joachim illersuisuuvoq.
Nalliuttorsiorneq pillugu allaaserisaq uani atuarneqarsinnaavoq: turisme.nu.
