Ukiup atuarfiusup aallartinnerani ungasianiit (alimasissumik) atuartitsineq Kommune Kujallermi pisarnertut aallartilluarpoq, ingerlalluarlunilu.
Kommune Kujallermi meeqqat nunaqarfinni ilinniarsimasunik ilinniartitsisoqarfiunngitsuni najugaqartut kalaallisut, qallunaatut, tuluttut, matematikkimilu iPad atorlugu alimasissumik atuartinneqartarput.
”Atuartitsinermi atuartut nunaqarfinniit assigiinngitsuneersut ataatsikkut atuartinneqartarput, taamaalillutik nunaqqatigiinngikkaluarlutik ungasianiit atuartinneqarnerminni atuaqatigiillutik atuartarlutik. Atuartitsinermi nunaqarfinni timelærit qanimut suleqatigalugit atuartitsineq Teams atorlugu ingerlasarpoq,” Kommune Kujallermi alimasissumik atuartitsisartoq Lillian Møller nassuiaavoq.
Ukiut marluk matuma siorna Kivitsisa Akademip nunatsinni alimasissumik atuartitsisartunut atuartitsisartussanullu pikkorissaatissamik filmiliornerani Kommune Kujallermi alimasissumik atuartitsisartut filmiliorneqarput. Alimasissumimmi atuartitsisarneq Kommune Kujallermi ingerlalluarpoq.
”Ungasianiik atuartittakkakka iPadimik atuillaqqissorujussuupput. Atuartitsinerit saniatigut App-i atorlugu suliakkiisarpunga, atuartut matumani aamma malinnaalluarput. Soorlu ullaaq manna takusinnaavara atuartut 22-it ilinniagassaminnik tunniussisimasut,” Lillian Møller oqaluttuarpoq.
Aappilattumi, Narsarmijini, Tasiusami, Ammassivimmi, Eqalugaarsunni aamma Igalikumi atuartut alimasissumik atuartinneqartartut katillutik 27-upput.
Savaateqarfiit ilaanni atuartinneqartalersutussat iPad-issaat maanna piareersarneqartut septembarip ingerlanerani piareeriarpata, atuartinneqartartut 32-nngussapput.
