Inooraq Brandt 1. oktober 2026 aallarnerfigalugu Tusassimi Teknikkimi Attaveqaasersuinermilu pisortatut (CTO) atorfinissaaq. Rambøll Kalaallit Nunaannit pisortaanertut inissisimanikooreerluni maanna Tusassip qitiunerpaamik tunngaviini akisussaasunngorluni pisortatut aallartissaaq.
Jonas Hasselriis marts 2026-imi Tusassimi ukiorpaaluit Teknikkimi Attaveqaasersuinermilu ingerlatsinermi akisussaasuusutut pisortatut inissisimareerluni pisortaanertut atorfeqalermat, teknikkimi pisortassamik nutaamik ujartuineq aallartinneqarsimavoq. Atorfinitsitsiniarneq annertoqisoq ingerlanneqareersorlu maanna atorfik Inooraq Brandt-imut tunniunneqarnissaa aalajangiunneqarsimavoq.
Inooraq Brandti Teknikkimi Attaveqaasersuinermilu pisortatut nunatsinni tusassip attaveqaasersuineranut ineriartortitsineq ingerlatsinerlu, tassuunalu nunatsinni attaveqaateqarnermi pisariaqarluinnartumik toqqammaviusut ataatsimut isigalugit akisussaaffigilissavai.
“Teknikkimut pisortaaneq (CTO) Tusassimut Nunattalu teknologiisigut ineriartorsinnaaneranut tunniussinissamut qitioqqinnaartumik inissisimasuuvoq, tassami suliffeqarfitta attaveqaasiornerup ingerlanneqarnissaa ineriartortittuarneqarnissaalu suliaata ilagimmagu. Taamaammallu atorfimmut inuttassarsiuineq annertooq peqqissaartorlu nunatta iluani aammalu nunani tamalaani inuttassarsiuussinertalik ingerlassimavarput. Tassani aqutsisutut suliatigullu tunngatillugu ilisimasaqarluarnissaq, tassungalu ilutigalugu nunatsinni pissutsinik ilisimaarinninneq periarfissanillu takunnilluarsinnaaneq pingaartitarisimallutigit. Taamaammallu Inooraq nunatsinni inuussutissarsiutigalugu suliaqartarneq aammalu nunatsinni suliniutinik ingerlatsisarneq ilisimalluarmagit atorfimmut iluatsissinnaasimagatsigut assut nuannaarutigaara.” Taama oqarpoq Tusassimi Pisortaaneq Jonas Hasselriis.
Inooraq Brandt aqutsinermi misilittagaqarluarluni aammalu nunatsinni inuussutissarsiutigalugu suliaqarnermik inuiaqatigiinnilu pissutsinik ilisimaarinnilluartuuvoq. Atorfeqartarnermilu ingerlarngani suliniutinik ajornakusoornarsinnaasunik aammalu suliffeqarfinnik ineriartortitsinermik, suleqatigiinnermik inuiaqatigiinnullu naleqarluartuusunik suliffeqartarsimalluni.
Teknikkikkullu pisortassap siunissami Tusassimiilernissani tassuunalu inuiaqatigiinnut nunatsinnilu suliffeqarfippassuit akornganni pisariaqarluinnartunik attaveqaasersuinermi ineriartortitseqataasinnaanissi ima oqaasertalerpaa.
“Tusass ukiut 100-t sinnerlugit inuiaqatigiinnut attaveqaasersuinermi pilersitsilluni, ingerlatsilluni aammalu ineriartortitsinermi aallussisimavoq, taamaammallu maanna tatigineqarluarlunga teknikkikkut pisortatut inissisimalersinnaaninga assut qujamasuutigalugu. Arlaliulluta attaveqaasersuineq teknologiinut kisiat attuumassuteqartikkaluarlugu, suliaqarfik ingerlanneqassappat inunnik tunniusimallutik suliarinnittuusussanik pisariaqartitsisuuvoq. Taamaammallu sineriartaaq tamakkerlugu sulisunik pikkorissorsuarnik, ulluinnarnilu ilaqutariit, sumiiffiit suliffeqarfiillu attaveqartuiarsinnaanissaannik anguniagaqarlutik suiaqartunik suleqateqarluarumaarnera qilanaaralugu.” Taama oqarpoq Inooraq Brandt.
Inooraq Brandt Tusassimi Teknikkimi Attaveqaasersuinermilu pisortatut ulloq 1. oktober 2026 aallarnerfigalugu atorfinissaaq.
