Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olseni pingasunngornermi aggustip 5-ani Nuummi illorsuaq timersortarfimmi Eyðnudeild Føroyar aamma NÛK All Stars Lykkeliga assammik arsarlutik sungiusarnerannut peqataavoq.
Eyðnudeild Føroyar Savalimmiuni meeqqanut inuusuttunullu immikkut pisariaqartitsisunut assammik arsarnermik neqeroorutaavoq. Holdi aggustip 3-aniit 10-anut Nuummut tikeraarpoq, Kalaallit Nunaannilu arsartartunik naapitsinermikkut timersorneq aqqutigalugu ataatsimoornermik nukittorsaallutik.
Tikeraarnermini Naalakkersuisup arsartartut ilassivai sungiusarnermullu nammineq peqataalluni.
– Savalimmiuneersut Kalaallit Nunaanneersullu arsartartut naapinnerat, tunniusimallutik sungiusarnerat ataatsimoornerallu misigisaqarfigalugit nuannaarutigeqaara. Timersorneq nuannaarnermik, imminut tatiginninnermik aamma attaveqatigiinnermik pilersitsisarpoq. Meeqqat inuusuttullu tamarmik ataatsimoortunut peqataasinnaanissaat, piginnaasaminnillu naleqartinneqarlutik misiginissaat pingaaruteqarpoq, Naalakkersuisoq Nivi Olsen oqarpoq.
Tikeraarneq Kalaallit Nunaata Savalimmiullu akornanni suleqatigiinnermik nukittorsaavoq, timersornerullu meeqqat inuusuttullu assigiinngissuteqaraluarlutik ataatsimoortissinnaagai ersersillugu.
