Kullorsuarmi innuttaasut sivisuumik kissaatigisimavaat illut anorimit silamillu nungullarsimasut pitsanngorsarneqarnissaat. Minnerunngitsumik inoqutigiit meerartallit illuinik iluarsartuussinissaq, illut qaliaannik qalissialersuinissaq illullu qalipanneqarnissaannik pisariaqartitsisoqarpoq. Avannaata Kommunia nittartakkamini taama allappoq.
Kajumissutsiminnik sulisut nunanit allaneersut arfineq pingasut ulluni makkunani Kullorsuarmi innuttaasut peqatigalugit ilaqutariit atugarisaannik pitsanngorsaaniarlutik sulipput. Ullaarnganiit unnummut qalipaasoqarlunilu qalissialersuisoqarpoq – takusiuk qanoq kusatsitsigisut
Sapaatip akunnerata aallartilaarnerani sulineq aallartippoq, ullullu tamaasa nunaqarfimmiut kajumissutsiminnik ikiuukkusuttut amerliartuinnavipput.
Nunanit allaneersunik kajumissutsiminnik sulisunik tuluttut oqaloqateqartoqartarpoq, assaat, isikkat kiinnarlu atorlugit takutitsinerit iluaqutigalugit – pisariaqariaqaraagallu meeqqat inuusuttullu nutserillutik ikiuuttarput.
Maannamut illut aqqaneq marluk qalipanneqarsimapput, illullu pingasut qaliaat qalissialerneqarsimallutik, Kullorsuarmi sunngiffimmi pisortaq Brigitte Kammann Danielsen oqaluttuarpoq:
”Ajoraluartumik kajumissutsiminnik sulisut nunanit allaneersut qanittukkut aallartussaapput, suleqatigiinnerli ataatsimoornerlu pitsaasoq ingerlatiinnassavarput, atortussat pisiarineqarsimasut tamaasa atorluarumallugit”, Avannaata Kommuniani sunngiffimmi aqutsisoq Brigitte Kammann Danielsen oqaluttuarpoq, taanna peqatigiiffik Kalaallit Meerartaat peqatigalugu iluarsaassinermik aaqqissuussisuuvoq.
Borgmesteri Lars Erik Gabrielsenip 2026-mi juulimi Kalaallit Meerartaat Avannaata Kommunialu akornanni suleqatigiinnissamik isumaqatigiissut atsiorpaa, taamaalilluni Kullorsuarmi immikkut sammisaq manna sammisallu allat meeqqat pitsaasumik inuunerisa nukittorsarneqarnissaannut peqataaqataasinnaaqqullugit.
