Peqqissutsimut Inunnullu Innarluutilinnut Naalakkersuisoq, Anna Wangenheim, Inuit Circumpolar Councilsip (ICC) Canadami nunap immikkoortuani Nunavummi illoqarfiit pingaarnersaanni Iqalunni 15-issaanik 2026-mi juulip 22-aniit 25-at ilanngullugu ataatsimeersuarnerani peqataanermini pingaarnertut oqalugiaateqartuuvoq.
Ataqatigiilluarneq, inuit issittormioqatigiit kinaassusaat peqqissuunissarlu, Naalakkersuisup ataatsimeersuarnermi “Inuit Identity, Physical, Spiritual, and Mental Health and Wellbeing“-mik taallugu ataatsimeeqatigiinnerit ilaanni pingaarnertut oqalugiaateqarnermini immikkut sammivai.
Peqqissuseq katsorsartinnermut napparsimanermullu taamaallaat attuumassuteqanngitsoq, Naalakkersuisup oqalugiaateqarnermini erseqqissaatigaa. Inoqatinut atassuteqarneq, kulturi, oqaatsit, pinngortitaq ataqatigiinnerlu inuit issittormioqatigiit inuunermi tunngavigisaannut ilaapput – taakkualu peqqissuunissamut tunngaviulluinnartunut aamma ilaapput.
“Peqqissutsimut politikki Issittup siunissaanut aamma politikkiuvoq. Issittormiuusugut ataqatigiillaqqissuserput, kulturerput ikioqatigiillaqqissuserpullu nukittoqutigaavut”. Anna Wangenheim oqalugiaammini taama erseqqissaavoq.
Naalakkersuisoq Nunavullu peqqissutsimut ministeria Iqalunni naapipput, Issittumilu peqqissutsimut pinaveersaartitsinermullu tunngasuni suleqatigiinnerunissamut periarfissat oqaloqatigiissutigaat. Issittumi nunap immikkoortuinik peqqissutsimut tunngasuni ajornartorsiutit iliuuseqarfiginissaannut suleqatigiinnerunissamut ilisimasanillu avitseqateqarnissamut periarfissaqarluartoq, Naalakkersuisoq isumaqarpoq.
Naalakkersuisut inuit issittormioqatigiit pingaartitaat, oqaasii kulturiallu tunngavigalugit nunatsinni peqqissutsimut tunngasuni periusissiaat Inuuneritta, kiisalu nunatsinni peqqinnissaqarfiup inuttut pisinnaatitaaffiit, kulturikkut naleqartitat ingerlariaqqinnissarlu tunngavigalugit ineriartortinneqarnissaa pisariaqartoq, Naalakkersuisup oqalugiaammini aamma eqqaavai. Oqaluttuarisaanitta ilinniarfiginissaa, meerartavut inuusuttortavullu pingaartumik eqqarsaatigalugit tarnikkut peqqinnerulernissarput kinguaariillu tulliinut neriuuteqalersitsinissarput pingaaruteqartoq, naalakkersuisup aamma erseqqissaatigaa.
Naalakkersuisuttaaq ICC-p inuit Issittormioqatigiit tusaaneqarnerunissaannut tunngasunik ukiuni 50-inngorluinnalersuni suliaqarneranut immikkut qutsavigaa.
“Isumassarsianik ulikkaarlunga inuillu Issittormioqatigiit peqqinnerulernissaannut ineriartortitseqatigiinnissamut neriuuteqarnerulerlunga Eqalunniit angerlarlunga aallarpunga. Ataatsimoorneq nukittunerulersitsisarpoq.”
Oqalugiaataa uani atuarneqarsinnaavoq
