Peqqissutsimut Inunnullu Innarluutilinnut Naalakkersuisup, Anna Wangenheimip, Inuit Circumpolar Councilsip (ICC) 15-issaanik ataatsimeersuarnerani peqataanerminut atatillugu Nunavummi napparsimmavimmut Qikiqtani General Hospitalimut pulaarlunilu Nunavummi peqqissutsimut ministeri Janet Brewster naapippaa.
Naalakkersuisup tikeraarnera ilisimasanik Nunatta Nunavullu inuisa issittormioqatigiittut ajornartorsiuterpassuinut periarfissarpassuinullu tunngasunik avitseqatigiinnissaannut periarfissiivoq.
Nunat marluk taakku sorpassuartigut imminnut assingusunik ajornartorsiuteqartut naapinnerisa ingerlanerani paasinarsivoq. Nunani taakkunani peqqinnissaqarfiit atorfinitsitsiniarnermut sulisooreersunillu attassiniarnermut, nunani taakkunani isorartoqisuni aamma siammarsimasunik inuttunngitsunillu inoqarfiliusuni peqqinnissaqarfiit atajuartuunissaannik qulakkeerinninnissamut nunallu taakku inuisa isorliunerusuniittortaannut katsorsaanermik neqeroornermut tunngasunik suliaqartuupput. Tamanna ilaatigut nunat taakku inuisa ilarpassui najukkaminniit ungasissumukarlutik ukiut tamaasa katsorsartikkiartortariaqarnerannik kinguneqarpoq.
“Naapinnerput isumassarsiffigisorujussuuara, atukkatigullu sorpassuartigut assigiiffeqaqisugut paasilertorlutigu. Naak nunavut killeqarfeqaqatigiinnatik avissaaqqagaluartut sorpassuartigut imminnut assingusunik ajornartorsiuteqarpugut. Taamaammat sorpassuartigut immitsinnut ilinniarfigisinnaavugut,” Peqqissutsimut Inunnullu Innarluutilinnut Naalakkersuisoq Anna Wangenheim oqarpoq.
Oqaloqatigiissutigisaat iIaatigut nunami inuisa kulturikkut tunuliaqutaat eqqarsaatigalugu paaqqutarinninnermut katsorsaanermullu tunngasutigut ineriartortitsinissamut, Issittumi peqqissutsimik ilisimatusarnermut tunngasuni pitsanngorsaanissamut, pitsaaliuinermut, imigassaq pillugu politikkimut, pinngitsuuisinnaajunnaarnermut katsorsaanermut inuillu issittormiut kulturiat, naleqartitaat pisariaqartitaallu aallaavigalugit ineriartortitseqqinnissamut tunngasut oqaloqatigiissutigaat.
Issittumi nunat immikkoortuisa akornanni suleqatigiinnerunissat ilisimasanillu avitseqatigiinnissaq oqaloqatigiissutigisaannut aamma ilaapput. Tamakku oqaloqatigiissutigeqqikkusukkitsik taamatuttaaq nunatsinnut Nunavummullu iluaqutaasussanik aaqqiissuteqaqatigiiffiusinnaasunut tunngasuni suleqatigiinnerunissaq kissaatigigitsik marluullutik aamma oqaatigaat.
Naalakkersuisup Qikiqtani General Hospitalimut pulaarnini Nunavummi peqqinnisaqarfiup qanoq aaqqissuussaaneranut tasamanilu innuttaasunut – uagutsitulli – aamma avinngarusimaqisumi Issittormiuusunut – peqqissutsikkut qanoq sullisseriaaseqarneranut tunngasunik paasisaqarfigaa.
Issittumi nunat immikkoortuisa suleqatigiinnissaat peqqinnissaqarfimmut tunngasuni ineriartortitsinissamut pingaaruteqartoq, Naalakkersuisoq erseqqissaatigaa.
“Aaqqiissuteqarnissamut tamatta immikkut periuseqartariaqanngilagut. Peqqinnissaqarfivut misilittakkanik ilisimasanillu avitseqatigiinnikkut pitsanngorsarlugillu nunat marluk taakku inuinut peqqissutsikkut pitsaanerusumik sullissinissaq qulakkeersinnaavarput. Suleqatigiilluarnissaannut periarfissaqarluartutut isigaara,” Anna Wangenheim oqarpoq.
