Nunaqarfimmi aqutsisut siullermeerlutik naapinissaanni Kommune Kujalleq aggustip arfernanni Narsami isumasioqatigiisitsilerpoq.
Isumasioqatigiinnerni nunaqarfinni aqutsisut kommunalbestyrelsillu akunnerminni suleqatigiinnerat nukittorsarneqassaaq. Matumani nunaqarfinni aqutsisut misilittakkaminnik avitseqatigiinnissaat aamma nunaqarfinni unammillernartut periarfissallu pillugit nunaqarfinnut pitsanngorsaataasussannik eqqartueqatigiinnissaat siunertarineqarluni.
Isumasioqatigiinnerup nunaqarfinni aqutsisut akunnerminni suleqatigiissiinnaanerat nukittorsaaffigissavaa, taamatullu nunaqarfinni aqutsisut ilisimasaat misilittagaallu kommunimi suleriaqqinnissanut atorluarneqassallutik.
Isumasioqatigiinnerup pitsaasumik oqalliffiunissaa aamma nunaqarfinnut innuttaasunullu tamanut pitsaasumik malitseqarumaarnera kommunimiit neriuutigineqarpoq.
-Isumasioqatigiinneq una ullormut ataasiinarmut naapiffiuinnarnavianngilaq, kommunalbestyrelsilli nunaqarfinnilu aqutsisut akornanni nukittunerusumik suleqatigiilersinnaanissaanut toqqammaviliisuussaaq. Suleqatigiillutami nunaqarfinni ineriartortitseqqinnissaq pitsaasumik sinaakkusersussavarput, siunissami nunaqarfimmi najugaqarnissap orniginartuujuarnissaa qulakkeerniarlugu, Kommune Kujallermi borgmesteri, Malene Vahl Rasmussen oqarpoq.
