Ukiuni kingullerni Tunumi, pingaartumik Tasiilami Kulusummilu, angallanneq pilersuinerlu pillugit inuiaqatigiinni annertoorujussuarmik oqallittoqarpoq. Taamaattumik Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq saaffiginnissuterpassuarnik tigusaqarpoq, tamatumalu saniatigut ajornartorsiut inuiaqatigiinni oqallisigineqangaatsiarsimalluni.
Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq, Iddimanngiiu Bianco Jensen, ima oqarpoq:
“Tunumi innuttaasut amerlasuut maanna atugaat pillugit ernumanerat pakatsisimaarnerallu paasilluarsinnaavakka. Angallannerup pilersuinerullu aalajaatsumik ingerlanissaat ulluinnarni inuuniarnermut aammalu ineriartornermut pingaaruteqarluinnarpoq, attaveqaatit pillugit nalorninartoqarnera innuttaasunut toqqissisimannginnermik pilersitsisinnaasarpoq.
Ilanngullugu erseqqissaatigissavara Naalakkersuisut ulluinnarni ingerlasut qanimut malinnaaffigaat, kiisalu susassaqartut attuumassuteqartut ingerlaavartumik oqaloqatigineqartartut, ilaatigut Tunumi angallannerup pilersuinerullu isumannaatsuunissaannik nukittorsaaqataasinnaasunik aaqqiissuteqartoqarnissaa anguniarlugu.”
